In custas dies, s’Amministratzione comunale de Lanusè at dadu su bene bènnidu a una truma de istudiantes de s’iscola segundària de primu gradu de Cave (RM), protagonistas de unu gemellàgiu cun sas tertzas classes de s’iscola mèdia de Lanusè. S’initziativa, mutida “Dagli Appennini all’Ogliastra”, est meda prus de bìsita iscolàstica, ma chi tenet unu valore culturale mannu.
Si tratat difatis de un’iscàmbiu culturale, un’oportunidade pro afortiare su diàlogu intre territòrios diversos ma serentes pro sas traditziones e pro su paisàgiu. Sos pitzocos de Cave, comunu de sa provìntzia de Roma cun 11 mìgia abitantes, ant a tènnere sa possibilidade de iscobèrrere sas bellesas naturalìsticas e archeològicas de s’Ogiastra, unu territòriu prenu de istòria e traditziones. Sa bisita cumprendet momentos de recreu e ispàssiu, ma prevedit fintzas addòbios de aprofundimentu e cunfrontu, cun fainas chi promovent sa valorizatzione de sas identidades locales e su respetu de s’ambiente.
In custas dies sos istudiantes latziales ant esploradu logos emblemàticos comente su NurArcheo Park, acanta sa chida passada est istadu inauguradu su portale Nuragic Experience, su situ archeològicu de Seleni e sa cresiedda de sartu de Maria Ausiliatrice, acumpangiados dae sos dotzentes e dae sos referentes de su progetu.
Su progetu, in prus de favorire s’iscàmbiu de connoschimentos, tenet sa punna de sensibilizare sos giòvanos a s’amparu de s’ambiente e a promòvere cumportamentos eco-cumpatìbiles. “Sa punna nostra- at naradu a L’Unione Sarda Giuliano Milana, professore referente pro s’istitutu de Lanusè- est de fàghere connòschere sas identidades territoriales, sas traditziones de su logu, sa biodiversidade, s’ambiente a traessu trekking, escursiones istòricas e naturalìsticas”.
Un’àteru obietivu de su progetu, comente at ispiegadu Alessandro Cianca, referente de s’istitutu de Cavi, est su de isvilupare una sensibilidade ecològica in sos pitzocos, acapiada a su connoschimentu istòricu e ambientale. “Gràtzias a su cunfrontu e su cumpartzimentu, sos pitzocos isvilupant mègius una cuscièntzia tzìvica, imparende a avalorare e costoire sas bellesas de su patrimòniu nostru.”
In abrile tocat a sos istudiantes de Lanusè andare a bisitare Cavi e sos montes Prenestini, in ue ant a iscobèrrere sas bellesas istòricas e naturales de Roma e de su Làtziu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
