Nos at lassadu Luigi Ladu, giornalista e pubblitzista, amantiosu de sa poesia e de sa literadura sarda, fundadore de su giassu www.luigiladu.it . Aiat 74 annos.
Nàschidu in Mamujada in su 1950, a pitzocheddu si nche fiat tramudadu primu a Orune, posca a Nùgoro e in fines, a batòrdighi annos ebbia, a Roma. In sa capitale italiana aiat coladu sa pitzinnia e sas primas esperièntzias de traballu, poderende semper unu ligàmene forte cun sa Sardigna. Ait fatu sa torrada a Sardigna cando aiant postu sas fàbbricas in su campu de Otzana, istabilende·si in Bolòtana.
Fiat malàidu dae meda e sàbadu coladu, a pustis de maigantos interventos chirùrgicos, est mortu in s’ospidale Santu Frantziscu de Nùgoro. Figura de importu in sa promotzione de literadura sarda, in su 2001 aiat abertu su situ www.luigiladu.it, una prataforma essentziale pro s’ispàinu de sa poesia sarda.
Òmine de cabbale e de bonu coro, Ladu fiat impinnadu meda in su volontariadu. Su contributu suo in s’AVIS est istadu fundamentale, cun incàrrigos de importu a livellu provintziale, regionale e natzionale, devenende unu riferimentu pro s’assòtziu. De prus, aiat partetzipadu a abèrrere sa setzione Admo (Assòtziu Donadores Cau Òsseu) in su Màrghine e fundadu una sotziedade isportiva de atlètica. Como fiat presidente onoràriu de sa setzione Avis de Bolòtana, ativa dae su 14 santandria 1987, chi l’ammentat pro s’aficu suo in su volontariadu e sa presèntzia contina in sas fainas locales. Cun s’Avis aiat organizadu eventos, contivigiadu publicatziones iscolàsticas e ammaniadu calendàrios fotogràficos intregados a sas traditziones e a sa memòria istòrica de su Màrghine e de su Gotzèanu.
Collaboradore de “L’Unione Sarda” comente currispundente, aiat curadu diversas antologias poèticas comente “Amigos Poètas”, un’òpera dedicada a sos printzipales autores cuntemporàneos in sardu, una regorta de sas poesias de Salvatore Poddighe, e de autores modernos comente Giuseppe Concas e Minnia Pani.
Su portale www.luigiladu.it, cun belle 380 autores catalogados, est unu beru archìviu de sa poesia sarda. In sos ùrtimos annos, pro more de sas cunditziones malas de salude, sa gestione de su giassu est colada a sa fìgia Loredana e a su ghèneru Danilo, chi ant a sighire a giùghere dae in antis su traballu suo.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
