Duos pitzocos, Michele e Ventura, detzident de acumprire unu gestu estremu e idealisticu: liberare duos caddos destinados a su fronte pro los sarvare dae sa gherra. Un’atu de rebellia chi naschet dae unu sentidu profundu de giustìtzia, ma chi los at a giùghere a un’iscontru drammàticu cun sas milìtzias fascistas, cambiende pro semper sa vida issoro.
Balentes est su tìtulu de su film nou de Giovanni Columbu, un’òpera de animatzione chi ponet in paris sa memòria istòrica cun sa balore de s’imàgine disegnada a manu.
Ispirada a unu fatu acontèssidu a beru in Sardigna in su 1940, sa pellìcula est formada dae 30.000 tàulas de paperi e pintzellu, cun un’istile chi paret pigare a riferimentu su tzìnema espressionista e sa pintura iperrealista.
A pustis chi dd’ant presentadu in unos cantos fèstival internatzionales de importu, Balentes debutat in Sardigna cun projetziones in Casteddu (su 29 de maju) e Nùgoro a su festival IsReal. Est prodùidu dae Luches srl cun Rai Cinema, in coprodutzione cun Tama Filmproduktion e cun s’amparu de sa Fundatzione Sardigna Film Commission.
In programa fintzas in Boltzanu, Bologna, Pescara, Zagàbria e Annecy, Balentes at a èssere distribuidu in tzìnems e tzicuitos culturales italianos e europeos.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
