Est pro comintzare un’esperièntzia a costàgiu de sos pitzinnos fìgios de chie est sutapostu a detentzione, in intro e in foras de sa domo tzircundariale de Uta, pro chi si nche bàrighent sos istereòtipos e sos pregiudìtzios chi, a dolu mannu, tenent subra de de palas.
Su progetu si narat Liberi dentro per crescere fuori e l’ant seberadu in intro de su Fundu de cuntrastu a sa povertade educativa minorile e de su bandu “natzionale” Liberi di crescere cun sa punna de ofèrrere a custos piseddos una oportunidade de crèschida individuale, de integratzione sotziale e de afortimentu de su ligàmene afetivu cun su genitore impresonadu.
Su progetu contat sa presèntzia de un’iscuadra de professionistas: psicòlogos, pedagogistas, educadores e assistentes sotziales in intro de unu modellu de interventu de sa progetatzione familiare partetzipada.
Sas atividades previdint su potentziamentu de su nùmeru de sas bìsitas a presone cun possibilidade de cuntatu fìsicu, s’adeguamentu de sos logos in ue sos fìgios isetant s’atopu cun su babbu o sa mama, acumpangiamentu e sustegnu, laboratòrios culturales cun artistas, isport, essidas, promotzione a sa letura.
A s’initziativa bi pigant parte sas cooperativas sotziales casteddajas Elan (cabu-filera), Exmè, Panta Rei Sardegna, Solidarietà Consorzio, sa domo tzircundariale “Ettore Scalas” de Uta, S’Ufìtziu interdistretuale de esecutzione penale esterna pro sa Sardigna (Uiepe), su servìtziu Polìticas sotziales abitativas e pro sa Salude de su Comune de Casteddu, s’assòtziu Prohairesis e Aragorn S.r.l.
Nessi 20 pro cada annu est su nùmeru de pitzinnos chi ant a èssere interessados. Sa punna est sa de aprontare percursos de agiudu pro 30 nùcleos familiares. Lunis su 28, dae sas 2 de merie, su primu addòbiu de presentatzione de su progetu cun sos partner de su progetu e sas famìlias cun persones interessadas dae penas detentivas.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
