S’abba chi est ruta su note coladu in sa parte sud-otzidentale de Sardigna tenet nùmeros e unas cantas cajones chi, a los bortulare, non bastant totu sos analizos complotistas e totu sas essidas simpres chi bident ebbia sos putzeddos brutos e non totu su restu imbutende·si.
In sa temporada de su note coladu b’at ghetadu abba a remore finas a s’acùmulu de 300 millìmetros. Abba chi a norma diat dèvere rùere in belle ses meses e chi, in sas prus zonas interessadas, at allagadu cantu b’aiat ingendrende una alluvione repentina, sa chi in inglesu li narant flash flood.
Abba chi at interessadu sas comunidades de Silìcua, de Biddaramosa, de Biddaspitziosa, de Deximumannu, de Uta, de Santu ‘Èngiu, de Marrùbiu, de Uras, de Pabillonis, de Biddacidru e de àteros logos cajonende istradas serradas, pontes derrutos, pranos furriados a paules e vidas e traballos marcados dae sa violèntzia sua.
Totu custu in giru de pagas oras, dae sas 2.30 de note a sas 5 de mangianu. Prus de 160 sas cramadas de agiudu a sa sala operativa de sos Vìgiles de su fogu. B’at fintzas duos òmines chi galu non s’agatant: unu in sos sartos de Nuxis e unu in tretos de Monte Arcosu.
Ma tocat a èssere craros: custa est abba in cantidade prus chi non manna chi diat pònnere in suferèntzia logos che a custos sena cunsiderare su livellu de sas manutentziones. E tocat a nàrrere chi eventos che a su de su note coladu, etzetzionales, acontessent cun frecuèntzia semper prus manna.
Duncas cheret chi miremus a sa sèria a sos efetos de sos mudamentos climàticos analizende paris sas undadas de calore e sas furriadas repentinas, sa sicagna e sas alluviones.
Finas a sas ses de merie de lunis su 28 b’at allerta de arriscu idrogeològicu, como de colore arantzu, in sas zonas de s’Igresiente e de su Campidanu (grogu pro arriscu idràulicu e temporadas). Sos ogros sunt puntados a chelu, s’ispera est chi sa temporada non si repitat.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
