Otieri archìviat sa de sessantaghimbe editziones de su Prèmiu omònimu de literadura sarda cun una grandu tzerimònia de premiatzione de sos autores. Sa manifestatzione de sàbadu su 23 de santandria, in su teatru tzìvicu “Oriana Fallaci”, l’amus a ammentare comente un’ispetàculu de sa cultura cuntemporànea sarda cun versos, contos, càntigos e medas òspites ispetziales.
Introduida dae unu càntigu maestosu de su Coro Ilune de Durgale e dae Clara Farina chi at resadu “Non si poni resistì” tzelebrende su de 300 anniversàrios de sa nàschida de su “Catullu gadduresu”, sa serada nos at fatu a bìdere sa vitalidade de unu cuncursu chi dae su 1956 est su puntu de riferimentu printzipale de s’iscritura literària in limbas de Sardigna.
Su presentadore Piersandro Pillonca, cun sa condutzione sua in sardu pro intreu, at mantesu arta e cun e grandu maestria, s’atentzione de su pùblicu.
Momentos artos de emotzione los amus bidos cando Giannalisa Murgia est artziada a parcu pro resare su bator trobojadu iscritu dae su babbu Sarvadore, su binchidore de sa setzione “Tra poesia e càntigu” dedicada a Antoni Cubeddu. Su poeta macumeresu, cun sa poesia sua in risposta “A s’amigu Bannantoni Busio”, aiat otènnidu sos cunsensos de sa giuria ghiada dae Dino Manca pròpiu cando chi arriveit sa nova de sa morte sua, su mese de austu.
E a Murgia est pròpiu Manca chi l’at ammentadu in sa relatzione sua. Su dotzente de Filologia in Tàtari at propostu a sos presentes unu biàgiu in ue s’aedu de Pubusone (custu su nùmene de su sartu suo) essit a campu che a su chi at «cantadu e traduidu in poesia, sublimende·la, un’esistèntzia marcada dae su sacrifìtziu e dae sa fadiga rude, est s’esèmpiu paradigmàticu de su chi at chertu nàrrere sa poesia pro medas sardos e de su chi su Prèmiu Otieri at acraradu cun custos poetas».
Calorosu fintzas su saludu a Antonio Canalis, presente in sala a costàgiu de su presidente Vittorio Ledda e de su visupresidente Pierluigi Saba. Custa est sa prima editzione cun unu segretàriu nou, Marco Fenudi. E pròpiu Fenudi at ammentadu s’impignu de su de in antis in totu custos annos, comintzende in pare cun su fundadore Tonino Ledda e sighende·bi·la, collende s’eredidade sua, finas a oe.
Aprètziu mannu l’at retzidu sa poesia de s’otieresu Luca Meledina (sa de tres in sa setzione “Antoni Sanna”) e gasi etotu sas de Giovanni Piga e de Antonello Isoni (de sa matessi setzione, cun s’ùrtimu de sos duos binchidore) e sas de Dante Erriu e de Andrea Columbano (in sa setzione chi l’at bìnchida Murgia). Agradèssidos fintzas sos contos de Domenico Battaglia (su chi at bìnchidu in sa setzione), de Giuseppe Tirotto e de Giancarlo Secci.
A su poeta Mario Solinas su prèmiu ispetziale pro sos emigrados intregadu dae Andrea Dettori, cabu de gabinetu de s’assessoradu de s’Istrutzione pùblica. Presentes in sala, faghende sos onores de domo, sos otieresos Gianluigi Sotgia, cabu de gabinetu de s’assessore de su Bilantzu e Davide Giordano, in rapresentàntzia de s’assessoradu de s’Agricultura.
In intro de sa manifestatzione, che est possìbile a la bìdere dae su canale Youtube de su Prèmiu, si sunt esibidas prus bortas sas giai mentovadas fèminas de su Coru Ilune dirìgidu dae su maistru Alessandro Catte. Su cumplessu vocale at conchistadu su “Trofeu de s’arte” ofertu dae sa Provìntzia de Tàtari e assignadu a personalidades o grupos chi si sunt distintos amparende o annoende sa traditzione artìstica isulana.
Custos sos àteros prèmios ispetziales: unu a s’etnomusicòlogu Bustianu Pilosu (prèmiu “a sa cultura” ofertu dae sa Sotziedade Beata Vergine de su Remèdiu) pro s’aficu suo difundende su càntigu a tenore; unu a s’economista Luigi Guiso (“Premio Ozieri” ofertu dae sa gioielleria Puggioni) pro sas anàlisis econòmicas suas e pro sos contributos suos a su “Rapporto Draghi” ordinadu dae sa Cummissione europea; unu a s’educadore Lorenzo Braina (prèmiu “Città di Ozieri” ofertu dae sa Pro Loco) pro s’atividade sua de formatzione de sos mannos e de sos insegnantes.
In sa tzerimònia s’archivista Stefano Tedde at contadu su traballu de archiviatzione acumpridu sos meses colados in pare cun sa collega sua Mariangela Deidda cun totu sas òperas finas a sa de sessanta editziones: unu progetu de ischedadura istèrridu dae sa dotora Floriana Me e chi como est a disponimentu de sos chircadores. Sa domo de su Prèmiu Otieri, in ue b’est su fundu, at como otènnidu unu finantziamentu pro su megioru suo: s’Unione de sos Comunes, chi est propietària de s’istrutura, como nde faghet unu logu cun prus fàtzile atzessu pro sos disàbiles.
Annuntziadu, in finitias, dae su sìndigu Marco peralta, unu finantziamentu de 700mìgia èuros pro su megioru de su teatru tzìvicu.
Cuntentos mannos sos giurados Anna Cristina Serra, Cristiano Becciu, Duilio Caocci, Clara Farina, Attilio Mastino, Riccardo Mura, Giambernardo Piroddi, Simone Pisano, Gabriele Tanda, Salvatore Tola. Como sa mirada est a sa de sessantases editziones.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
