Afortiare in ònnia manera e in ònnia àmbitu sa candidadura a s’Unesco de su patrimòniu nuràgicu sardu: Est custu s’iscopu de sa Fundatzione Sardegna Film Commission, chi bolent donare fama a sa Sardigna e a s’istòria sua.
Est giai istadu firmadu unu protocollu de intesa, cussu pro sustènnere s’Assòtziu “La Sardegna verso l’Unesco” e donare coddu a sa candidadura de is monumentos de sa tziviltade nuràgica in sa “Tentative List” de s’Unesco pro su 2021.
Sa Sardigna Film Commission, in calidade de ente regionale de sa filiera audiovisiva, est aprontende dae meda sa promotzione de su territòriu. Difatis, pro mèdiu de sa produtzione de òperas comente pellìculas de autore o fintzas òperas prus isperimentales de animatzione e video-giogos, si diat bòlere aunire a pari s’istòria de sa comunidade cun su paesàgiu sardu durante is sèculos.
“Pròpiu s’animatzione e su limbàgiu de is video-giogos est oe unu campu de produtzione artu e innovativu — custas sunt is paràulas de su Presidente de sa Sardigna Film Commission Gianluca Aste — e nois depimus puntate cun fortza in cussu, paris cun s’Assessoradu regionale a su Bilantzu e a sa Programmatzione. Cun su progetu NAS, “Nuova Animazione in Sardegna”, sa Regione est investende in custa realidade pro promòvere cultura e istòria de su territòriu nostru, cun sa punna de afortiare sa positzione de s’ìsula in su mundu de s’indùstria audiovisiva internatzionale”.
Pro presentare sa candidadura noa de sa tziviltade nuràgica, sa Sardigna Film Commission at aprontadu un’iscuadra de giòvanos animadores 2D chi ant a istudiare is potentzialidade de s’istòria isulana de època nuràgica.
Ma ddoe at fintzas una novidade: sa Sardigna diat pòdere intrare in unu film de animatzione de Netflix. Dd’at naradu Anne Sophie Vanhollebeke, sa presidente de Cartoon Italia: “Netflix at detzìdidu de investire risursas in custu setore – at ispiegadu – e fintzas sa Sardigna at a èssere protagonista: est giai una manera de sighire su traballu e incumentzare a pensare e ite fàghere”.
Su primu addòbiu at a èssere su 26 de maju: in Casteddu at a torrare Cartoon Digital, unu de is eventos prus de importu pro s’animatzione internatzionale cun produtores dae totu su mundu.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
