Noi salas de espositzioni aundi ant a èssi amostadas is prendas chi arribant de Nora, unu laboratóriu chi at a permiti a is visitadoris de biri in deretura is operatzionis de restàuru de is repertus archeològicus: apustis de 13 annus in Pula torrat a abèrriri su museu “Giovanni Patroni”, in d’unu logu arrenovau e meda prus mannu.
Cun su Parcu archeològicu de Nora, sa Torre del Coltellazzo e sa crèsia de Sant’Efis, is visitadoris ant a podi torrai a castiai is colletzionis de su museu chi donat una fotografia de is diferentis fasis de su passau de su territóriu de Pula. Sa gestioni de su museu, disinnau de nou de s’architetu Jari Franceschetto cun s’agiudu de is curadoras de su progetu scentìficu Emanuela Atzeni e Chiara Pilo de sa Soprintendèntzia archeològica, at a èssi afidada a sa Fundatzioni Pula Cultura Diffusa.
Po su sìndigu de Pula, Walter Cabasino, no si tratat sceti de un’abertura noa, ma de un’inauguratzioni de unu museu totu nou: “De duas salas seus passaus a noi, ma seus chistionendi de unu museu destinau a crèsci ancora de prus”.
Chiara Pilo, archeòloga de sa Soprintendèntzia, contat su chi ant a agatai is visitadoris: “Is logus de espositzioni funt cuncordaus po àreas temàticas, chi contant is èpocas diferentis de Nora e amostant is logus pùbblicus de sa tzitadi, cussus de cultu e sa necròpoli. Su museu nou no contat sceti de Nora, ma chistionat de unu territóriu intreu. Intra de is cosas de importu chi is visitadoris ant a podi agatai, podeus arregordai is pituras in is murus de su fàbbricu a est de su Foru; su balsamàriu a forma de babuinu agatau in sa necròpoli fenìtzia; statueddas votivas agatadas in s’ex àrea militari, e prendas chi funt bessidas a pillu de is tumbas”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
