Angelo Becciu non leat parte a su Conclave. Su cardinale de Pattada lunis at annuntziadu sa renùntzia a s’eletzione de su Paba nou. Dd’at naradu isse etotu dae in antis a sa congregatzione de is cardinales addobiados pro faeddare de su Conclave imbeniente.
Segundu s’Ansa e su giassu Open, Becciu diat àere naradu de tènnere su diritu de intrare in sa Capella Sistina però in fines e cun tristura at renuntziadu a sa rechesta. Custa est sa versione de is giornales galu no ufitzializada dae Becciu etotu chi no at lassadu faeddos a s’imprenta.
In is dies coladas a Becciu aiant fatu lèghere duas lìteras firmadas dae Paba Frantziscu acanta est iscritu chi non podet pigare parte a su Conclave. Paràulas chi cunfirmant sa positzione de s’ufitziu de imprenta de su Vaticanu chi in sa lista de is cardinales ammìtidos in su Conclave aiat definidu Becciu comente “non elettore”.
Duncas como su casu est serradu, su 7 de maju serrant is ghennas de sa Cappella Sistina. Becciu at abbarrare a foras.
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
