Dae su primu a su 3 de trìulas, su Parcu iscientìficu e tecnològicu de Pula aberit sas ghennas suas a sa de chimbe editziones de s’Ussic (s’UniCa sport science international conference). S’eventu, ospitadu in sos ispàtzios de Sardegna ricerche, rapresentat unu de sos momentos de cunfrontu prus de importu a livellu globale pro custu setore.
Organizadu dae s’Universidade de sos istùdios de Casteddu e suportadu dae s’ente sardu pro sa chirca e s’isvilupu tecnològicu in intro de su progetu ‘Medicina e Sport’, s’addòbiu punnat a pònnere paris in una mesa de cunfrontu ùnica chircadores, istudiantes e professionistas de sas iscièntzias motòrias chi sunt lompende a Sardigna dae diferentes cugiones de su mundu.
Sa crae de sa manifestatzione at a èssere s’interdisciplinaridade. Sa dibata iscientìfica si proponet de nche brincare sas làcanas traditzionales pro abbratzare maigantos àmbitos e sas interconnessiones issoro: dae sa fisiologia de s’esertzìtziu a sa genètica; dae sa biomecànica a s’allenamentu; dae sa nutritzione a sa psicologia; dae sa salude pùblica a sa gestione de sa carriera dòpia de sos atletas.
Su chi at a marcare a beru custa editzione est s’atentzione manna pro s’atividade fìsica, grandu istrumentu de preventzione e de meighina personalizada e pilastru fundamentale de sa sinergia intre s’ateneu e Sardegna Ricerche.
S’eventu Ussic, in prus, at a èssere arrichidu dae su cursu Isak (chi comintzat su 29 de làmpadas finas a su primu de trìulas) pro chi si potzat otènnere una tzertificatzione internatzionale de giudu in contu de mesuratziones antropomètricas. Custu cursu rapresentat unu percursu formativu de primore chi punnat a cualificare ispetzialistas capatzes de impreare sos paràmetros fìsicos pro valutare e megiorare in manera mirada sa salude e sos tratamentos de sos patzientes.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
