A pagas dies dae su comintzu de sa de trintasete editziones, su Time in Jazz at retzidu sa medàllia de su Presidente de sa Repùblica italiana.
“Sa medàllia chi su Cabu de s’Istadu at chertu intregare a sa 37/a editzione de su Festival Internatzionale Time in Jazz – at naradu Paolo Fresu, babbu e ghia de sa manifestatzione nòdida – est una impèllida pro bi la sighire a produire mùsica e arte in un’Ìsula, sa Sardigna, chi aunit sa grandu traditzione populare a s’innovatzione. Creimus chi nd’apat suspidu s’ispìritu chi faghet de su Time in Jazz unu laboratòriu culturale mannu chi contribuit a dare rispostas contemporàneas in contu de su ruolu de sas comunidades minores chi òperant cun mirada glocale”.
Su Time in Jazz est in programma in Belchidda e in àteras bìndighi localidades de su nord Sardigna intre Monteacutu, Gaddura, Baronia e Meilogu: Alzachena, Bànari, Bultiggjata, Budune, Lòiri, Locusantu, Òschiri, Otieri, Porto Rotondo, Pasada, Puntaldia, Santu Diadoru, Tèmpiu, Tula e Bidda ‘Eccja. Custos unos cantos intre sos protagonistas dae s’8 a su 16 de austu: su trumbetista Theo Croker, su sassofonista Kenny Garrett, su pianista Omar Sosa in duo cun Paolo Fresu. In lista fintzas s’omenàgiu a Fabrizio De André cun Neri Marcorè, Scarlet Rivera e sos Borderlobo.
Su tìtulu de s’editzione de ocannu est ‘A Love Supreme’, su matessi de su de sèighi discos de John Coltrane.
“Su 1964 – serrat Fresu – su sassofonista americanu intrat a istùdiu, in New York, pro registrare in sessione ùnica e cun unu cuartetu istellare, unu de sos discos prus de importu de s’istòria de su jazz. A Love Supreme est un innu a s’amore universale e a sa paghe. Est una chirca interiore e s’espressione de su chi non si podet espressare in prus de èssere sinònimu de isperimentatzione e contaminatzione a su puntu de devènnere un’òpera maistra de sa mùsica afro-americana e unu de sos discos prus iscurtados peri su mundu in pare cun ‘Kind of Blue‘ de Miles Davis. A pustis de ‘Rainbow‘ e de ‘Futura‘ petzi A Love Supreme podiat èssere su tema de sa XXXVII editzione de Time in Jazz intre tempus coladu e benidore”.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
