In Àrthana, in su coro de su Gennargentu, est in faimentu unu progetu culturale e turìsticu nou intituladu “Centenàrios“. S’initziativa previdet su collocamentu de prus de 20 cartellos informativos dedicados a sos tzentenàrios de su logu, famados pro sa longevidade issoro. Sos pannellos, in limba sarda e italiana, ant a èssere postos dae in antis a sas domos de sos tzentenàrios arthanesos.
Su progetu, finantziadu dae sa lege 482/99 e de sa LR 22/99 de sa Regione Autònoma de sa Sardigna, faghet parte de sas fainas promòvidas dae s’Isportellu s’Ufìtziu Limba Sarda “Su sardu ogni die e in ogni logu”. S’obietivu est non petzi su de onorare sa memòria de sos bètzos chi nche ant giumpadu su sèculu de vida, ma fintzas de avalorare su tzentru istòricu de Àrthana, acumpangende sos bisitadores a s’iscoberta de sos bighinados antigos de sa bidda. Cada cartellu at tènnere una biografia pitica de su tzentenàriu, una fotografia, sas datas de nàschida e de morte, s’edade chi at lòmpidu.
Custa initziativa sighit àteras operatziones de valorizatzione de sa longevidade promòvidas dae su comunu de Àrthana. Ocannu coladu, duas òperas in corten, realizadas dae s’artista de Orane Roberto Ziranu, sunt istadas collocadas in sa pratza tzentrale in onore de Raffaela Monni (109 annos) e Angelo Stochino (101 annos). In su 2022, sos betzos de Àrthana fiant istados protagonistas de su progetu “Ratza Umana – Human Race” de su famadu fotògrafu Oliviero Toscani, chi aiat fotografadu betzos e tzentenàrios galu in bida, esponende posca sas fotos ingrandidas in sa “Via dei Centenari”, a costau de sa crèsia parrochiale.
Cun “Centenàrios”, su comunu sighit a onorare e tzelebrare sos tzentenàrios de Àrthana, parte integrante de sa “Blue Zone” de sa Sardigna, reconnota a livellu mundiale pro su primadu suo de longevidade.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
