Francesca Albanese e sa Sardigna. No, no est un’atacu de artìculu che a cussos istèrridos pro carchi Vip in pessu lòmpidu a s’àteru mundu in chirca de “un po’” de su chi bi essit pro lu dare a ischire. Francesca Albanese e sa Sardigna contat de una persona chi est contende de àteros lòmpidos a cuddae ma chi Vip non sunt.
Francesca Albenese custas dispedidas tristas, in pare cun sa manu isperdidora, las at contadas in Sèneghe in su fèstival Cabudanne de sos poetas. Ma b’at àteru. Sas dies coladas a sa reladora ispetziale Onu pro sos territòrios palestinesos ocupados dae Israele l’ant dadu sa tzitadinàntzia onorària in Nùgoro.
In su Comune barbaritzinu ant aprovadu sa motzione proposta dae su grupu Pd–Riformistas. In prus de sos votos de sa majoria si contant fintzas sos “emmo” de sos cussigeris de minoria Lisetta Bidoni, Mario Carcassi e Maura Chessa. Tres sos votos contràrios (intre custos su leghista Pierluigi Saiu) e 2 sos astènnidos (unu de custos su chi si fiat candidadu a sìndigu pro su tzentru dereta Antonello Cucca).
In Tàtari, imbetzes, l’ant dadu sas craes de sa tzitade, semper cun votu consiliare. Fintzas sa proposta de custu intregu tzìvicu de ondras naschet dae sos bancos de su campu largu. Mancu a lu nàrrere registramus sa contrariedade de Fratelli d’Italia. Su cabu de grupu issoro Roberto Cadeddu l’at giuigada «istrumentale e ipòcrita» ca nât chi «cheret partzire custa tzitade intre chie est sensìbile e chie nono». A bisu suo est una «crìtica a su guvernu». Paràulas, custas, chi parent sa de sa presidente italiana de su Cussìgiu in ue totu (comintzende dae sa Global Sumud Flotilla) paret una crìtica a s’esecutivu.
Ma ite b’intrat sa Sardigna cun sa Palestina? Est de giudu a formulare una risposta pròpiu cun sos faeddos de Albanese in Sèneghe: «Penso a beru chi sa Sardigna, prus de cale si siat àteru logu in Itàlia, cumprendat de istintu sa chistione de s’autodeterminatzione, duncat ite chèrgiat nàrrere a èssere colonizados». A custu b’ant pensadu sos cussigeris de Nùgoro e de Tàtari?
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
