Nùgoro torrat a s’abbratzare sos Inti Illimani. O a su nessi parte de issos. Su 5 de santandria comintzat pròpiu in su Teatru Eliseo su tour de Jorge e de Marcelo Coulon in pare cun su cantautore Giulio Wilson e s’iscritore Federico Bonadonna.
Sas tapas issoro sighint in Itàlia pro totu su mese cun apuntamentos in Bologna, Gènova, Milanu, Roma, Perùgia e àteras tzitades.
«B’at unu trenu immaginàriu – leghimus in sa presentada de custos eventos – chi atraessat su mundu intreu colleghende s’Itàlia cun su Tzile colende in Frorèntzia, Roma, Bucarest e Berlinu. E in cada una de custas firmadas àrtziat calicunu. Pro mèdiu de unu caleidoscòpiu de cantzones e de ammentos, sos bator contant cun mùsica e (pagas) paràulas, sos sessanta annos de atividade de su grupu tzilenu: dae su primu discu de su 1967 finas a Agua, fatu cun su cantautore fiorentinu, sena nos ismentigare de Violeta Parra e de Victor Jara, de su golpe de su 1973, de s’esìlio e de sa torrada a sa pàtria issoro».
“In viaggio con gli Inti Illimani” est un’ispetàculu teatrale in ue amus a intèndere sos istrumentos musicales antigos precolombianos comente sos flàutos de Pan, su rondador, su charango e sas cantzones issoro chi sunt innos de generatziones intreas: Gracias a la vida, Vale la pena, El Aparecido, El pueblo unido jamás será vencido.
Sos Inti Illimani tenent unu bellu ammentu de sa Sardigna e de Nùgoro. Pròpiu in su teatru Eliseo su grupu tzilenu soneit su 1974 in pare cun su Gruppo Rubanu de Orgòsolo presentende a sos presente su ponte musicale intre sa traditzione andina e sa de su càntigu a tenore. Sos tzilenos dae semper sunt ambassiadores de sa resistèntzia contra a sas ditaduras e a sas ingiustìtzias.
Sa mùsica issoro est unu veìculu de isperas e de batallas, mescamente in su cuntestu atuale caraterizadu dae su genotzìdiu in Gaza. Si fintzas custu trenu immaginàriu at a dare su contributu suo, su benidore podet èssere mègius de comente nos l’immaginamus.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
