Sàbadu colau, su 26 de mese de ladàmine, a ora de is 17.30, su Comunu de Armùngia, in intro de su Fèstival Premio Emilio Lussu, at inauguradu sa biblioteca comunale noa in s’ex iscola mèdia statale, torrada a asseliare gràtzias a sos finantziamentos de su PNRR. A s’eventu ant partetzipadu meda tzitadinos e amantiosos de sa figura de Lussu.
Su sìndigu de Armùngia, Antonio Quartu, at abertu sa tzerimònia manifestende s’orgòlliu suo pro custu traguardu, sutaliniende s’importu de custa initziativa pro sa bidda e pro su totu territòriu. Fatu fatu, est istada presentada una regorta de tres volùmenes de sos atos de sos cunvegnos internatzionales subra de Emilio Lussu, tentos intre su 2018 e su 2022 gràtzias a s’organizatzione de s’assòtziu culturale L’Alambicco. Sos volùmenes, publicados dae su matessi assòtziu, rapresentant unu contribuidu interdisciplinàriu ricu meda chi abbratzat istòria, literadura, polìtica e arte. Gràtzias a s’iscoberta de fontes noas de archìviu, sos istudiosos ant annantu contribuidos rilevantes e agiuntu interpretatziones noas subra de s’òpera e subra de sa figura de Lussu, creschende su connoschimentu de s’eredade intelletuale e morale sua.
Interessantes meda sos interventos de Gian Giacomo Ortu e Christian Rossi, chi ant aprofundidu su ruolu de Lussu a livellu europeu e internatzionale, evidentziende s’impatu de sa personalidade de gabale sua in sas massas. Dinnu de annotu fintzas su contributu de Alberto Cabboi, diretore de su sistema museale Emilio e Joyce Lussu, chi at esploradu aspetos prus pagu connotos de Lussu, comente s’impinnu suo pro s’amparu de sas minorias etnica italianas. In prus, Cabboi at acraridu su raportu significativu intre Lussu e Gaetano Salvemini, istòricu e intelletuale antifascista.
Sa tzerimònia est sighida cun s’aberidura ufitziale de sa biblioteca, beneita dae su pàrrocu Don Danilo, e de sos aposentos in ue sunt espostos, in prus de fotografìas de època de Lussu, sos manifestos de s‘Istitutu Sardu pro s’Istòria de sa Resistèntzia e de s’Autonomia, acanta aiat operadu fintzas Joyce Lussu.
Unu de sos momentos prus emotzionante de sa serada sena duda est istadu sa bìsita a s’istùdiu casteddàiu de Emilio Lussu, ammaniadu in una sala a su pranu in pitzu de sa biblioteca. S’istùdiu est istadu torradu a concordare cun sos arredos originales restaurados, batidos dae s’apartamentu de pratza Martiri in Casteddu, in ue, su 31 santugaine 1926, Lussu aiat paradu fronte a sas iscuadras fascistas. “Custu gestu – at naradu Alberto Cabboi – abarrat in s’istòria comente esèmpiu de ispenetu e dignidade tzivile, primu atu de resistèntzia antifascista de Lussu”.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
