Sa nova dada a sa grussera est chi ant sutràidu tres pitzinnos a su babbu e a sa mama dae sa domita issoro in unu padente abrutzesu. No est fàtzile a sighire un’allega chi pertocat persones privas de amparu. Mescamente si sunt criaduras interessadas dae esclusividade familiare in antis e dae interventu pùblicu a pustis.
No est fàtzile, mescamente si custas acontèssidas sunt motivu de istrumentalizatzione polìtica dae parte de is chi (pensemus a Bibbiano) punnant a conchistare (o a re-conchistare) cunsensu carignende chistiones chi nche sunt in foras de sas capatzidades analìticas issoro. Fintzas a su puntu de difèndere (cosa chi imbetzes est prerogativa de sas “erìghinas rujas”) una famìlia de extracomunitàrios sena permissu de sogiorno. Emmo, custa categoria de persones, semper de-umanizada, como est artziada a modellu petzi ca babbu e mama sunt biancos e otzidentales (issu inglesu, issa australiana).
S’argumentu est dìligu e sas guarnissas de allega in sas retes sotziales sunt sas pròpias de sas chi amus connotu in tempos de pandemia, mancari como pàrgiat s’isulamentu sa parte positiva de sa dicotomia e non sa sotzializatzione. Argumentos che a custos ponent a chie si siat in dificultade. In teoria non semper ischimus dae cale parte comintzare. Custu giru però totu movet dae un’intossicatzione cajonada dae sos tuntunnos chi chie los at collidos los aiat dèvidos connòschere mègius de cale si siat persone urbanizada.
Est tando, e no est chistione de eris, chi sas istitutziones (fartosas, a tesu dae sos bisòngios, totu su chi cherimus) si sebestant de sa fatzenda. Fintzas is sanitàrios connoschent gasi una realidade dìliga: movende dae sas reatziones emotivas de sos piseddos; movende dae sa contrariedade de babbu e mama a s’impreu de una sondina de plàstica. Est dae un’annu chi si nde sunt ocupende sos servìtzios sotziales e non nd’aìamus dèvidu faeddare, forsis nemmancu in sa crònaca locale, pròpiu pro non nche pònnere custas criaduras in sas bucas de chie si siat. Ma calicunu at comintzadu pro sas punnas suas e como tocat a su giornalismu a contare sa chistione cun sa prus manna professionalidade. Non nde semus seguros. Ma cheret fatu. In antis de totu pro sos pitzinnos.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
