Poesia aumentada: is cantadores impreant tecnologias noas Un'ispetàculu teatrale de poesia a bolu cun s'impreu de su digitale

Sa limba sarda, sa traditzione de sa poesia a bolu, e is tecnologias noas de su digitale. Un’intrina chi podet mudare su modu de fàghere poesia e teatru in s’annu 2020: ‘Poesia aumentada’ est s’ispetàculu chi est istadu presentadu sàbadu 25 de su mese de ghennàrgiu in sa Domo de sa cultura de Casteddu.

Sa cantada, complessa traditzione de poesia a bolu, improvisada, in limba campidanesa, benit batida in iscena dae sos giòvanos poetas pro mèdiu de una narratzione originale e digitale, chi acùrtziat su pùblicu a s’espresione prus arta de sa cultura sarda: un’ischire antigu prenu de istòria, balores morales, ironia e abilidades retòricas.

Sa poesia a bolu est un’arte cumplessa e ispantosa chi però oe arriscat de iscumpàrrere. S’ispetàculu ‘Poesia aumentada’ permitit a s’ispetadore de torrare a iscobèrrere sa cantada, atobiare in s’iscena sos giòvanos poetas sardos, nativos digitales, in gara teatrale cun is tecnologias noas. Acumpangiados dae sa chiterra, is poetas faeddant tra issos intonande mutetus, mètricas tìpicas de sa traditzione sarda, tratende temas tra is prus vàrios pro mèdiu de unu sistema cumplessu de metàforas e analogias.

In iscena is poetas Simone Monni (Brucei), Luca Pinna (Cuartu Sant’Aleni), mentras s’accompangiamentu a sa chiterra est curadu dae Mario Aledda (Brucei), sa règia e sa drammaturgia sunt de Ilaria Nina Zedda, is noas tecnologias e lughes sunt de Marco Quondamatteo. Pro s’iscuadra creativa digitale b’at Claudia Pupillo e Simone Murtas. Elvio Corona est su fònicu. Sa consulèntzia sientìfica est a cura de s’etnomusicologu Marco Lutzu. Sa produtzione de su progetu de poesia aumentada est istada realizada a s’internu de su Progetu Domo de sa Cultura dae s’Acuilone de Viviana, Video Gum Production e Mega Coop.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.