A pustis de in prus de oto dècadas de atividade, s’istatzione meteorològica de Cabu Bellavista, in sa costa de mare de Tortolì, at serradu. Custu bolet nàrrere ca su servìtziu de osservatziones oràrias e previsiones meteorològicas, de importu mannu pro piscadores, navigantes e entes locales, non nch’est prus. Sa mancàntzia de su servìtziu s’est intèndia deretu, cando pro more de sa temporada mala de sas dies coladas, sas naes e barcas chi colaiant in s’isprigu de abba cara a su portu de Arbatassa, ant telefonadu de badas a s’istatzione pro àere calicuna informatzione, ma a s’àtera banda non b’aiat nemos de rispòndere.
S’istatzione meteorològica de Cabu Bellavista at abertu in su 1914, a servìtziu de sa Regia Marina, posca, in su 1933, est intrada in sa rete de su Servìtziu Meteorològicu de s’Aereonàutica Militare. In su 1936 est passada a istatzione de prima classe, cun sa responsabilidade de marcare datos importantes comente temperadura, pròina, pressione atmosfèrica, umidade e diretzione de su bentu.
In prus de regòllere sos datos climàticos, su personale fruniat assistèntzia puntuale a sos navigantes, un’agiudu pretziosu mestamente cun su tempus malu. Nointames su valore de su servìtziu, s’Aereonàutica Militare, pro motivos de reorganizatzione interna, at tramudadu a Foghesu e a Dèximu is chimbe sutaufitziales chi traballaiant in Monte Turri. Cun sa serrada de su tzentru de rilevamentu acabbat fintzas un’era, sende chi a banda su ruolu operativu suo, pro sa populatzione de s’Ogiastra tenet fintzas unu valore istòricu e simbòlicu.
S’istatzione metereològica s’agatat a suta de su faru de Bellevista, fraigadu in su 1866 subra de sa turre de Largavista, de època ispagnola, fraigada cussa puru in pitzu de su Nuraxi de Monte Turri.
In sos ùrtimos annos, Capu Bellavista est istadu fintzas insertada intre sas tapas de sa manifestatzione “Monumenti Aperti,” e ogna annu est bisitadu dae iscolanos e turistas.
In unu cuntestu de cambiamentos climàticos e fenòmenos atmosfèricos semper prus intensos, sa detzisione de serrare s’istatzione meteorològica at postu medas in pensamentu, primu tra totus su sìndigu de Tortolì, Marcello Ladu, chi at decraradu de àere allegadu de s’importu de custu presìdiu cun su prefetu de Nùgoro in ocasione de s’abbìgiu mèteu ruju, ponende a notu comente custa detzisione s’annanghet a sa de unos cantos annos a oe, cando aiat cungiadu sa base militare de Capu Bellavista, chi comente si siat sighit a èssere presidiada dae su personale de su Polìgunu Isperimentale de su Sartu de Cirra. (Foto Stara Claudio).
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
