Su cuncursu literàriu su prus vidanu de Sardigna (su de 7 in Itàlia in
òrdine cronològicu) lompet a su traguardu de sos setanta annos. Su de 67
bandos at bidu sa lughe in custas dies annuntziende un’editzione chi at a èssere
istòrica non pro s’anniversàriu de sa fundatzione sua ebbia, ma fintzas pro sa
torrada a sas raighinas de su calendàriu.
Nàschidu su 1956 dae s’idea de su poeta e maistru Tonino Ledda, su Prèmiu at
acumpangiadu s’evolutzione de s’iscritura in sardu e in sas variedades alloglotas
(turritanu, gadduresu, tabarchinu e aligheresu). In unu tempus chi sa poesia
iscrita comintzaiat a brionire a mannu (pensemus ebbia a sa grandu esperièntzia
de sa rivista “S’Ischiglia”), su Prèmiu Otieri devengeit su puntu de riferimentu
pro sa dignidade literària de sa limba sarda. Oe sa missione sighit gràtzias a
s’APS “Premio Ozieri”, ghiada dae su fìgiu Vittorio, chi contivìgiat cun amore
onni detàlliu organizativu.
S’editzione 2026 marcat una torrada de importu a sas orìgines suas: sa
tzerimònia de premiatzione est pro su 26 de cabudanni, abbratzende·si a sa
festa de Nostra Sennora de su Remèdiu, cuntestu in ue su prèmiu nascheit. A
custu antìtzipu si cumbinat s’iscadèntzia pro sa presentatzione de sas òperas: su
materiale cheret imbiadu intro e non prus a tardu de su 31 de martzu (non prus
in maju comente in sas editziones in antis).
Su cuncursu est articuladu in sas tres setziones istòricas, chi abbratzant su
ventàlliu intreu de sa produtzione literària:
Setzione “Antoni Sanna” (Poesia): Dedicada a su linguista bonorvesu giai
presidente de sa giuria. Riservada a poesias cun tema e ischema lìberos
(màssimu 40 versos).
Setzione “Tonino Ledda” (Prosa): Riservada a contos inèditos cun longària
màssima de 5 cartellas (formadu A4, corpus 12).
Setzione “Antoni Cubeddu” (Tra Poesia e Càntigu): Dedicada a sas
cantzones cunforma a sos ischemas de sa traditzione orale.
Ocannu sa de tres setziones tenet unu valore simbòlicu mannu: ruent difatis sos
130 annos dae sa prima gara poètica improvisada sarda, chi tiu Cubeddu li deit
vida pròpiu in Otieri, in pratza de Cantareddu, su 1896.
Totu sas informatziones a minudu in contu de modalidades de imbiu (in pabiru o
via e.mail), de prèmios pro sos primos tres classificados de onni setzione e de
compositzione de sa giuria tècnica nche sunt in intro de su situ ufitziale
www.premiozieri.it
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
