“Il Cammino delle Janas”. Est custu su nùmene de su progetu aprontadu dae sas dotoras Cristina Muntoni, Maria Giovanna De Martini e Sara Mameli de su CeSIM (Centro studi identità e memoria) chi proponent un’itineràriu isperimentale in su Meilogu. Tiesi, Boruta, Cherèmule e Bessude sunt sas biddas interessadas.
«Custos monumentos – narant is organizadoras –, testimonias istraordinàrias de sa cultura e da sa sotziedade isulana intre su V millènniu aC e su de tres, nos dant una crae de letura fundamentale pro cumprèndere sas caraterìsticas tziviles, funeràrias e màgicas-religiosas de sas comunidades sardas antigas».
Sa punna no est sa de ispainare ebbia connoschèntzias istòricas e archeològicas, ma finamentas sa de istèrrere sas bases pro un’oferta turìstica culturale a tretu de nde batire bisitadores, istajone balneare o mancu.
«Sa valorizatzione de sas Domus de Janas comente destinatzione de turismu archeològicu podet intzentivare itineràrios esperientziales, percursos immersivos e atividades de divulgatzione faghende de sa Sardigna una meta prus chi no ammajadora pro is chi chircant unu biàgiu culturale autènticu».
S’apuntamentu est pro su 12 e su 13 de abrile. Custas sas tapas: s’abbadia e su muristene de Sorres, su pinnetu de Sa Mura e sa gruta Ulari in Boruta; su parcu de sos Petroglifos, su litu de su Tìpiri e su nuraghe Majore in Cherèmule, sa necròpoli de Mandra Antine e sa crèsia de Santu ‘Eneitu in Tiesi; su museu MuMe in Bessude.
“Il Cammino delle Janas” est sustènnidu dae su ministeru de sa Cultura e dae sa Regione. S’idea de s’itineràriu est nàschida in intro de su progetu “Arte e architettura nella preistoria della Sardegna. Le Domus de Janas” comintzadu dae su CeSIM su 2018 e interessende paritzos Comunes sardos pro otènnere su reconnoschimentu de sos prus de importu sitos preistòricos nostros comente patrimòniu mundiale Unesco.
Inoghe su link a s’eventu cun sos oràrios e totu sas àteras informatziones.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
