Sighit finas a su mese de làmpadas sa rassigna sa “Primavera letteraria per la salute mentale” comintzada su 28 de martzu in Casteddu. Custu beranu literàriu pro sa suferèntzia psìchica est aprontadu dae is assotziados de s’Arsarp, sòtziu sardu chi dae belle 40 annos (est nàschidu su 1986) gherrat pro chi s’acumprant sos disponimentos de sa riforma psichiàtrica.
Sos apuntamentos sunt chimbe, unu pro cada publicatzione. E chimbe sunt sos argumentos chi, movende dae sa cunditzione de custos tzitadinos, pertocant sos aspetos a custa collegados: s’organizatzione de sos servìtzios e sa visione culturale issoro; sos logos de cura; sas pràticas fortzosas; sos diritos de is persones; su protagonismu de is chi sunt deretu interessados; sos disafios e sas oportunidades.
Sa punna est sa de «abèrrere unu cunfrontu a campu abertu pro nche torrare in sa riflessione pùblica e in s’atzione polìtica su problema de sa tutela de sa salude mentale e de sos diritos fundamentales de sa persone in sa sotziedade cuntemporànea».
S’esòrdiu l’ant afidadu a su sagista e chircadore indipendente Antonio Esposito, autore de su libru “Come Cristo in croce” imprentadu dae s’editore Sensibili alle Foglie. Su libru – movende dae testimonias e resocontos giuditziàrios – est una denùntzia pùblica de sa pràticas prus chi no ispainadas de cuntenimentu fìsicu e de privatzione de sa libertade e de sa dignidade umana in sos logos de contivìgiu.
S’autore at propostu de nche barigare sa trìbide custòdia–repressione–paternalismu promovende unu modellu chi, in totue, garantat su chi a beru narat sa riforma de su 1978 galu inaplicada. In riferimentu a sas istòrias contadas b’est sa de tziu Bruno, dae prus de deghe annos presu in manos e cun unu cascu de pedde in conca in intro de unu tzentru Aias de Sardigna.
Custos sos àteros apuntamentos: su 24 de abrile in Casteddu cun su libru “Sono schizofrenica e amo la mia follia” de Elena Cerkvenic; su 16 de maju in Pauli cun “Della cura – Studi fenomenologici e salute mentale” de Loredana di Adamo; su 13 de làmpadas in Silìcua cun “Franco Basaglia passato e presente di una rivoluzione”, di Ludovica Jona e Elisa Storace; su 30 de làmpadas in Casteddu cun “Pratiche basate sull’evidenza e pratiche promettenti nella psichiatria di comunità” de Paola Carrozza.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
