Su progetu Amparu est lòmpidu a sos concruos suos cun sa Festa Natzionale de su Cantu a Tenore ospitada in su teatru nugoresu de Santu Zosepe, un’eventu chi at mustradu comente s’echilìbriu de su càntigu a tenore siat s’ispigru fidele de una comunidade sana.
In su tenore, sa bellesa naschet de s’incastru perfetu de bator boghes distintas chi, puru mantenende s’identidade pròpia, s’atopant produende un’armonia ùnica. E pròpiu custu printzìpiu de unione canora est su motore de unu pianu de amparu chi s’est trasformadu in un’esperimentu sena pretzedentes.
Sa de eris in Nùgoro – ue ant cantadu grupos giòvanos de tenores de Nule, de Tiesi, de Fonne, de Golòthene, de Onieri e de Orgòsolo – non fiat petzi un’esibitzione formale, ma una torrada pùblica de un’arte chi vivet in su respiru colletivu de unu pòpulu intreu.
Dae su mese de nadale de s’annu coladu, su progetu at ischidu fraigare cussu chircu màgicu de su càntigu no in su palcu ebbia, ma in su tessutu sotziale de sas 45 comunidades interessadas, ue sa gana de su cunfrontu e sa de istare paris fiant sa base pro sa tutela de su patrimòniu Unesco.
Dae sa dimensione de su grupu sìngulu, Amparu at allargadu s’orizonte conca a una coesione intercomunitaria a tretu de unire 102 colletivos canoros in una carovana de sa traditzione cun 139 addòbios in 45 biddas, giughende sos cantores a dialogare tra issos e cun sas comundades, cun sas iscolas, cun sas istitutziones.
Sa governance partetzipada, fatzilitada dae s’unione intre Istitutu etnogràficu Isre, coordinamentu Campos e assòtzios Boches a Tenore e Tenores Sardigna, at fatu de sos cantores sos protagonistas de cada detzisione.
Chie at assìstidu eris a sa manifestatzione at pòdidu cumprèndere, fintzas dae sas paràulas de Bustianu Pilosu (coordinadore de sa rete de su Cantu a Tenore), de Diego Pani (responsàbile iscientìficu de su progetu), de Ignazio Macchiarella (etnomusicòlogu de s’Universidade de Casteddu), de Noemi Fadda (de s’Isre), de Gigi Oliva (Campos), de Gian Mario Cossu (Tenores Sardigna) e de Mario Mureddu (Boches a Tenore), cantu su progetu tèngiat raighinas e punnas.
S’impignu de sa Regione b’est, cunforma a su chi ant naradu sa presidente de sa Giunta Alessandra Todde e su cabu de gabineti de s’assessoradu de sa Cultura Andrea Dettori.
Sa serada, animanda dae su sonu de sas launeddas, dae sos càntigos sacros de sos Cantores de Irgoli e dae sas improvisatziones poèticas in otava rima e a mutetus, l’ant dedicada a Frantziscu Cubeddu, cantore seneghesu mortu pagas dies a como.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
