A pustis de belle oto annos de traballu, eris in su Teatru Massimo de Casteddu sa projetzione de s’anteprima de su docufilm de Gianfranco Cabiddu “Su Maistu. Vita di Luigi Lai maestro di Launeddas”, norantatrès annos e màssimu interprete in vida de s’istrumentu traditzionale sardu.
A in antis de su cumentzu, su regista Gianfranco Cabiddu, meda cummòvidu, saludadu su pùblicu e at torradu gràtzias a totus is chi ant agiudadu a sa relaizatzione de s’òpera. Unu traballu articuladu e ingimiriosu, nàschidu dae su disìgiu de contare siat s’istòria artìstica, siat su caminu umanu de su maistru Luigi Lai, nàschidu in Santu Idu in su 1932.
Dae sa pitzinnia in Sardigna a s’emigratzione e a sa torrada a s’ìsula, su film sighit su mastru in unu percursu chi atritzat traditzione e mùsicas de su mundu, dae is biddas sardas a is palcoscènicos internatzionales, intre Irlanda, Iscòtzia e New York.
Su documentàriu est comente unu biàgiu umanu e artìsticu in sa vida de Luigi Lai, sìmbulu de sa cultura musicale sarda, capatza de giùghere unu de is trastos prus antigos de su Mediterràneu a su tzentru de su diàlogu musicale cuntemporàneu. Is bìsonas, difatis, in su contu de su regista Gianfranco Cabiddu divenit unu linguàgiu universale, capatzu de adobiare su jazz, sa mùsica culta e s’isperimentatzione, sena mai pèrdere su ligàmene cun is raighinas populares.
S’òpera, frutu de unu traballu longu de unos sete annos, alternat imàgines, testimonias e momentos de vida bera, torrende unu retratu verdaderu de su mastru. Tzentrale est fintzas su raportu intre mastru e dischente, elementu fundamentale pro sa trasmissione de una connoschèntzia antiga chi bivet galu oe gràtzias a sa pràtica direta e a sa continuidade generatzionale.
A donare prus valoe a sa pellìcula sunt is presèntzias de artistas de cabbale de s’iscena musicale sarda e internatzionale comente Paolo Fresu, Elena Ledda, Gavino Murgia e Mauro Palmas, chi testimòniant su valore e s’influèntzia chi s’arte de Lai at tentu in su cuntestu musicale mundiale.
Cabiddu at faeddadu de su film comente “unu gestu de amore, ma fintzas unu dovere”, sutaliniende s’apretu de contare una figura chi rapresentat unu monumentu de sa cultura sarda. Non pro nudda medas mùsicos internatzionales, intrende in cuntatu cun Lai, ant bìvidu momentos de rivelatzione artìstica, reconnoschende in is launeddas un’orìgine funguda de medas pràticas musicales cuntemporàneas.
Sa resessida de s’òpera dd’ant cunfirmada fintzas in su Bari International Film Fèstival (Bif&st), acanta “Su Maistu” at bìnchidu su prèmiu pro su mègius film italianu. Sa giuria at evidentziadu sa capatzidade de su documentàriu de trasformare sa respiratzione tzirculare in una bera “catarsi colletiva”, esaltende su ruolu de su tzìnema in sa cunservatzione de is benes immateriales de s’umanidade.
Dae is imàgines de su docufilm nde essit a campu cun craresa su retratu de un’òmine chi at cunsagradu — e sighit a cunsagrare — sa vida sua a sa mùsica, trasformende sa traditzione in una missione culturale.
Intensa sa presèntzia in sala de su regista, de is interpretes e de Luigi Lai etotu, chi at bidu su film pro sa prima borta paris cun su pùblicu. Unu momentu de grandu partetzipatzione emotiva, agabbadu cun unu tzaca manedda longu longu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
