Dae sa Valtellina a s’Ogiastra: est cumintzada in Tortolì s’editzione 2026 de “Grifone”, s’esercitatzione annuale prus importante de chirca e sucursu aèreu (SAR – Search and Rescue) organizada dae s’Aereonàutica Militare. Is fainas, inghitzadas su 25 maju, ant a sighire finas a cras, su 29 de maju, interessende belle totu territòriu costerinu e de monte ogiastrinu.
Cun base operativa in s’aeroportu de Tortolì in s’esercitatzione sunt impinnados aèreos, iscuadras operativas e personale ispetzializadu de is Fortzas Armadas, de is Corpos de s’Istadu e de cumponentes internatzionales, comente una rapresentàntzia de sa fortza aèrea ispagnola. Sa punna est afortiare is capatzidades de pianificatzione, coordinamentu e gestione de is operatziones de sucursu in logu de monte, siat a de die siat a de note, simulende intzidentes aèreos, chircas de persones e apretos cumplessos.
S’organizatzione de sa faina est contivigiada dae s’Aereonàutica Militare, mentras su coordinamentu de is operatziones a terra est de cumpetèntzia de su Corpus Natzionale Sucursu Alpinu e Ispeleològicu (CNIS) e de su Corpus Natzionale de is Vìgiles de su Fogu. Paris cun issos òperant Aereonàutica Militare, Esèrtzitu Italianu, Arma de is Carabineris, Politzia de Istadu, Guàrdia de Finàntzia, Guàrdia Costerina, Protetzione Tzivile, 118, Rughe Ruja Italiana, Corpus Forestale e Vigilàntzia Ambientale e Ejèrcito deel Aire ispagnolu.
In custas dies is òmine impinnados in is esertzitatziones ant simuladu interventos realìsticos pro testare s’integratzione intre operadores diversos e megiorare s’eficatzidade de is rispostas in cuntestos difìtziles. Intre is iscenàrios simulados fintzas su recùperu de persones ispèrdidas o in dificultade in zonas malas e is operatziones de sucursu sutzessivas a intzidentes aereonàuticos.
Su sartu de Triei, a presu de is tumbas de is gigantes de Òsono, est divènnidu s’iscenàriu de una de is simulatziones prus significativas: un’interventu de sucursu dedicadu a perssones cun disabilidades in ambiente rurale e montanu. Totu s’Ogiastra s’est trasformada in una genias de “palestra su sucursu”, ue sunt testadas interoperabilidades, lestresa de interventu e capatzidade de cooperatzione intre istruturas natzionales e europeas.
Fintzas sa Protetzione Tzivile de sa Regione Sardigna partètzipat in manera ativa a s’esercitatzione cun su setore drones, su volontariadu de protetzione tzivile e su sustennu logìsticu e de is comunicatziones pro mèdiu de sa rete ràdiu regionale.
Pro cras, chenàbura de 29 maju, est prevìdidu unu “Media Day” dedicadu a is òrganos de informatzione: giornalistas e operadores acreditados ant a pòdere assistire a unas cantas fases operativas prus importantes de s’esercitatzione e addobiare is responsàbiles de su coordinamentu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
