In Sìnnia ant festau po sa de cuatru bortas sa dì de su sardu. Giòbia su 28 de maju in s’iscola ant torrau a repitiri un’esperimentu: su de fai fueddai is pipius e is pipias sceti in sardu po una dì.
“Giai de candu eus incarrerau s’atividadi nosta cun s’ufìtziu de sa lìngua sarda in Sìnnia in su 2023 – faint sciri de su Progetu Sa Lìngua – eus luegus traballau impari a is scolas, de classi in classi seus intraus po imparai a is pipius sa lìngua nosta donendi-ddi a is pipius unu imparu fitianu”.
“Custu traballu – sighint – impari a sa volontadi de is maistas e su de nci ai crètiu at donau vida a unu esperimentu mannu: su de apariciai una dì po is pipius chi siat totu in sardu (a su mancu po una dì)”. Po s’editzioni de ocannu in sa pratza de Crèsia sa bidda ddoe fiat sa cantante Claudia Aru.
Prus de duxentus pipius e pipias funt essius de is murus de is scolas insoru po afestai su sardu: ant recitau, ant fatu su casu, letzionis de scièntzia, ant lìgiu, ant ballau, ant cantau e si funt spassiaus. Totu in sardu.
“Diis comenti a custa – est iscritu in unu post de su s’Ufìtziu lingua sarda – nci podint essi sceti gràtzias a dònnia arrogheddu chi traballat e donat una manu de agiudu po chi custa festa siat cumpria: s’amministratzioni comunali, sa biblioteca, su Mua, is volontàrius de sa Misericordia e totus is chi ant fatu atividadi cun is pipius. Gràtzias a sa scola cun sa dirigidora e is maistas chi funt su coru chi movit totu su chi s’est fatu oi. Torraus gràtzias medas a Claudia Aru, gràtzias a issa eus pòtziu acabai sa festa in una manera chi mellus no podemus sperai. Gràtzias a totu sa comunidadi chi si agiudat essendinci e creendinci”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
