Dae su 4 a su 7 de cabudanni, sa Biblioteca Satta de Nùgoro acasàgiat una rassigna tzinematogràfica intregada a sa defensa de sa terra e de sos deretos, cun sa partetzipatzione de registas e invitados de cabbale.
Dae su 4 a su 7 cabudanni 2024, in su Giardinu de sa Setzione Sarda de sa Biblioteca Satta de Nùgoro, s’at a tènnere sa rassigna tzinematogràfica “Terra e libertà”, un’eventu chi cheret ofèrrere unu tretu de riflessione fungudu subra s’òmine e su ligàmine cun sa terra sua. Bator seradas, bator ocasiones pro si cunfrontare cun òperas tzinematogràficas chi esplorant temas e problemas de oe in die.
Su programa de sa rassigna, contivigiadu dae su regista nugoresu Francesco Pirisi, proponet sa projetzione de longumetràgios de registas sardos nòdidos: Peter Marcias, Enrico Pau e Monica Dovarch, autores chi cun su traballu issoro ant ischidu contare cun sensibilidade e intensidade sa realidade de sa Sardigna e sas cumplessas dinàmicas sotziales e culturales suas. Paris a custos film, ant a èssere presentados fintzas tres curtzumetràgios firmados dae giòvanos talentos de su tzìnema sardu: Simone Contu, Vittoria Soddu e Sergio Scavio, chi ant a contribuire a arrichire sa dibata cun prospetivas noas e acostamentos innovativos.
Su tìtulu de sa rassigna, ispiradu a su famadu film de Ken Loach “Terra e libertà”, rifletet sa temàtica tzentrale chi unit sas òperas in programa: sa relatzione vitale e a s’ispissu conflituale intre s’òmine e sa terra sua, unu ligàmene chi, si contivigiadu cun atentzione e amparadu cun determinu, podet garantire prosperidade e seguridade, siat pro su sìngulu indivìduu siat pro totu sa comunidade. Nointames, comente evidèntziant sas òperas seletzionadas, sa destruidura de s’ambiente, sa pèrdida de su deretu a su traballu, sa violèntzia, su nichilismu e s’olvidu de sa memòria istòrica sunt minetzas cuncretas chi meletzant su presente nostru, arrischende de torrare a nudda sos sacrifìtzios e sos isfortzos acumpridos fintzas a como pro megiorare sa calidade de sa vida.
Sas projetziones ant a èssere sighidas dae momentos de cunfrontu intre pùblicu e autores, chi ant a partetzipare a sas seradas pro cumpartzire sas motivatziones e sas istòrias a palas de sos traballos issoro. Sa serada de inghitzu de su 4 cabudanni at a èssere arrichida dae s’interventu de unu rapresentante de su Comitadu Nugoresu Contra s’Ispeculatzione Energètica, chi at a dare su contributu suo a sa discussione, chistionende de s’importu de amparare e defensare su territòriu.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
