Chenàbura chi benit un’eventu de non pèrdere, cun sa projetzione de documentàrios archeològicos suta sos isteddos, in su situ archeològicu de S’Arcu ‘e is Forros de Biddamanna Strisàili.
Custu chenàbura, su 30 de austu, su situ archeològicu de S’Arcu ‘e is Forros at a acasagiare sa tapa finale de su Sardinia Archeo Festival – Mediterraneo Immaginato, chi at a bìdere sa collaboratzione intre Itzokor Onlus, Archeonova (gestore de su situ) e su Fèstival de sa Comunicatzione e de su Tzìnema Archeològicu de Licodia Eubea.
Su programma de sa serada previdet sa presentada de duos documentàrios archeològicos, in anteprima pro sa chi at a èssere sa primu editzione de su Fèstival de su Tzìnema Archeològicu. Sa projetzione at a cumintzare cun “I leoni di Lissa”, unu documentàriu de atzione e de aventura dirìgidu dae Nicolò Bongiorno. Realizada in su 2019, custa pellìcula de su 1976 remonat sa batalla navale mìtica de Lissa de su 1866, sìmbulu de sa marineria moderna. Pro mèdiu de una narratzione chi s’isvilupat intre su mare de s’ìsula de Lissa e sas àndalas de sa memòria, su documentàriu acumpàngiat sos ispetadores in unu biàgiu intre esploratziones subàcueas, istòrias eròicas e sa chirca de antigos relitos chi rapresentant unu bucone cuadu de s’Unidade de Itàlia.
A sighire, at a èssere presentadu “In the Beginning”, unu curtzumetràgiu de Shaun Clark (Rennu Unidu, 2022) chi, a traessu su manìgiu innovativu de sas tècnicas de s’animatzione, esplorat su tema de s’identidade e de su tempus. Su contu, de unos 11 minutos, chistionat de una fèmina interrada in s’oscuridade chi osservat su passàgiu de sos sèculos, in una chirca de su logu suo in su mundu.
De prus, chie cheret at a pòdere abarrare a corcare in tenda in su situ archeològicu, gosende·si de s’atmosfera ammajadora de custu logu ispantosu prenu de istòria.
Pro partetzipare a s’eventu est a mutire a sos nùmeros 3280570071 (Itzokor) o 3783027077 (Archeonova), opuru iscrìere a s’indiritzu de posta eletrònica a info@archeonova.it. Su programma cumpletu de s’eventu lu agatades in sa locandina.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
–
