Fine de sas trasfusiones. Su 13 ghennàrgiu de su 2026 su primu malàidu talassemicu sardu s’at a sutapònnere a unu prelevamentu de sambene in s’ospidale Brotzu de Casteddu. Sas tzèlulas istaminales emopoieticas suas ant a èssere imbiadas a sos Istados Unidos, a pustis ant a torrare modificadas in modu de permìtere a s’organismu de prodùere un’emoglobina chi funtzionat. E chi at a cunsentire a su malàidu de èssere indipendente dae sas trasfusiones.
At a èssere su primu passu de sa terapia gènica pro sa beta-talassemia chi in Sardigna afigit unos milli persones. Custu tipu de terapia est destinada a sos malàidos intre sos 12 e 35 annos.
Su Brotzu, ùnicu tzentru acreditadu in Sardigna, cumentzat sa prima protzedura in Itàlia. “Sas cumpetèntzias subra sa talassemia non naschent oe – afirmat sa presidentas de sa Regione, Alessandra Todde – ma benint dae tesu: dae su traballu, dae sa bisione e su sacrifìtziu de su professore Antonio Cao e de totus sos mèigos chi in su tempus ant donadu balore a su Microcitemico. Unu patrimòniu chi andat reconnotu e afortiadu. Est importante a sutaliniare chi custu est su resurtadu de unu traballu de iscuadra”, otentu gràtzias a su traballu multidisciplinàriu de pessones meda chi si sunt dedicadas, gastende energias e tempus pro cròmpere un’obietivu ambitziosu, chi podet cambiare a beru sa vida de sas persones”.
Intro ghennàrgiu ant a èssere duos sos malàidos chi s’ant a sutapònnere a sa terapia noa. S’aberit gosi unu benidore nou in Sardigna pro su tratamentu de sas maladias ereditàrias de su sàmbene.
