Su ligàmene intre su sabore autènticu de su territòriu e sos disafios tecnològicos de su futuru chinghet a nou La Caletta. Su 30 de abrile e su primu de maju torrat su “CalaBeer & Wine”, lòmpidu a sa de sete editziones suas, cunfirmende·si comente unu laboratòriu de ideas a tretu de aunire sièntzia artesanale e meledos cuntemporàneos.
S’eventu, pensadu dae s’assòtziu culturale Kawham cun su patrotzìniu de su Comune de Thiniscole, evolvet sa fòrmula istòrica sua isterrende su programma in duas dies pro tzelebrare s’etzellèntzia enogastrònomica sarda. Sa chi fiat nàschida comente a una manifestatzione dedicada petzi a sa birra artesanale est oe unu percursu de prus tastos chi acollit fintzas su mundu de sas bìngias. Ocannu sos visitadores ant a pòdere iscobèrrere sas produtziones de Marduk Brewery, Arabus Beer, CBW by Triulada, Reforte e Santu Jorgi, paris cun sos nètares de sas cantinas Binza ‘e su de Re, S’assu, Del Rimedio e de s’Azienda Agricola Nicolò Meloni.
Comente sutaliniadu dae su presidente de Kawham, Davide Fais, «s’obietivu est su de dimustrare chi sa comunidade locale est unu tzentru de innovatzione ativu totu s’annu, promovende un’imàgine de s’ìsula chi non si lìmitat a sa istajone istiale ebbia ma avalorat su traballu artesanale de calidade». Su CalaBeer & Wine non rinùntziat però a sa vocatzione sua de ispàtziu crìticu. In una data simbòlica che a sa de sa Festa de sos Traballadores, su 1 maju a mesudie, in s’Area Fraterna serente a sa crèsia, b’at a èssere su cunvegnu intituladu “Sa casseta noa de sos atretzos: S’IA e su mundu de su traballu”.
S’addòbiu previdet sa partetzipatzione de espertos de su setore impinnados in s’analizu de sas trasformatziones chi s’intelligèntzia artifitziale est imponende a su sistema produtivu.
Su programma de s’eventu est carcu e variegadu: si comintzat gioja su 30 abrile a sas 17 cun s’abertura de sos stand e su DJ set de Davide Merlini; a sas 22 est s’ora de su cuntzertu de Pino Scotto, istòria de s’hard rock italianu chi dae sos annos ‘80 est a giru, a primu cun sos Vanadium e a pustis comente solista.
Su mangianu de su primu maju at a èssere imbetzes dedicadu a s’isport e a sas famìlias cun su torneu de fùbalu “Yamal!” e sas atividades lùdicas “Play!”. E si in sa zona ZTL de carrera de Nazario Sauro s’ogru nche ruet subra de sas produtziones de s’artesania locale (cun espositziones de tzeràmicas, linna e prendas), sas origras sunt totu pro sa serrada musicale de sa manifestatzione afidada a sas performance de Niasa’, Cattivik, Rios e Breakin Down. Pro fatzilitare s’aflussu de sos visitadores, s’organizatzione at fintzas prevìdidu unu servìtziu navetta dedicadu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
