Su grupu de ativistas de Sardware pro sa presèntzia de su sardu in sa tecnologia at publicadu sa tradutzione de su gestore de podcasts lìberu AntennaPod.
S’aplicatzione, disponìbile pro Android, permitit a is utentes de chircare podcasts, ddos sarvare e ddos ascurtare. Comente totu is programmas chi Sardware bortat in sardu, iscrient in una nota “AntennaPod est lìberu, rispetosu de sa diversidade linguìstica e de sa riservadesa. Essende aici, AntennaPod no impreat publitzidade pro guadangiare dinare. Pro pònnere AntennaPod in sardu, depes isceti andare a Cunfiguratziones de Android> Sistema> Limbas> Limbas de su sistema“.
AntennaPod est a disponimentu pro dispositivos Android dae sa butega de aplicatziones Google Play e dae su repositòriu lìberu F-Droid.
No est su primu gestore de podcasts a disponimentu in sardu. Tempus a oe, Sardware at giai tradùidu su gestore Podbird pro dispositivos Ubuntu Touch, su primu sistema operativu mòbile disponìbile in sardu.
“Is istùdios – sighint is de Sardware – narant chi in custu sèculu ant a isparèssere intre su 50 e su 90% de is idiomas de su mundu. Est responsabilidade de ònnia persone de contribuire a sa mantenidura de su sardu. Non dèleghes, piga·nde parte tue puru: cumintza oe a modificare sa dieta tecnològica tua pro chi siat prus responsàbile linguisticamente”.
“Tenimus progetos medas – concruint – pro frunire a su pòpulu nostru un’ecosistema de aplicatziones lìberas, èticas e in sardu, ma no acudimus a sa sola. Contribui oe cun dinare (incarca inoghe) o agiunghe·ti a nois: tradutzione, disinnu, gestione de retes sotziales, programmatzione… onni agiudu at a èssere fundamentale pro sighire a mantènnere su sardu bivu in s’àmbitu digitale”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
