Vittorio Ledda presidente, Pierluigi Saba vitze e Marco Fenudi segretàriu nou: su Prèmiu Otieri càstiat a su benidore cun obietivos e progetos noos.
Unu capìtulu nou s’at abertu pro su Prèmiu Otieri. Su 25 làmpadas, in s’assemblea costitutiva, est nàschidu s’Assòtziu de promotzione sotziale “Prèmiu Otieri de literadura sarda Aps”. Su prèmiu literàriu istòricu, su prus importante in limba sarda, at acumpridu aici unu passu a in antis significativu meda, mudende·si dae simpre assòtziu culturale a ente de su tertzu setore, in lìnia cun sa reghente riforma de s’ordinamentu.
A s’assemblea ant leadu parte sèighi sòtzios fundadores chi ant aprovadu s’istatutu nou. Custu cambiamentu at a permìtere a s’Aps de retzire contributos dae is tzitadinos pro mèdius de sa declaratzione de is rèdditos, sena costos in prus a contu de is cuntribuentes. Su cunsìgiu diretivu at cunfirmadu a Vittorio Ledda comente presidente e a Pierluigi Saba comente vitzepresidente, mentras Marco Fenudi s’at a ocupare de sa segreteria, a pustis de 40 annos chi fiat segretàriu Antonio Canalis . Canalis, chi at a sighire a in s’assòtziu comente cussigeri paris cun Paola Basoli, est istadu ringratziadu pro s’impinnu suo dae Ledda, Saba e Fenudi, chi ant postu a notu comente apat fatu crèschere e evòlvere su Prèmiu sighende is rastos de su fundadore Tonino Ledda. Antonio Canalis
Custa istrutura organizativa noa garantit sa continuidade e una solidesa majore a su Prèmiu Otieri, un’esperièntzia literària ùnica in Sardigna. «Cun s’Aps Prèmiu Otieri – declarant Ledda, Saba e Fenudi – amus a sighire punnende a avalorare sa limba sarda e is limbas de Sardigna. Amus a sighire su traballu de catalogatzione de is òperas lòmpidas dae su 1956, progetu chi at otentu unu finantziamentu ministeriale, e no amus a rinuntziare a su protzessu de modernizatzione de su cuncursu e de sa poesia inghitzadu dae tempus in pare cun sa prus chi non cualificada Giuria ghiada dae su Prof. Dino Manca».
In is dies imbenientes, s’assòtziu at a annuntziare su calendàriu de is eventos collaterales a sa 65 editziones de su cuncursu literàriu, in programam pro custa istade. Intre is obietivos de s’Aps ddoe tenet fintzas is collaboratziones cun àteros assòtzios e entes locales. « Tocat a ammentare – serrant Ledda, Saba e Fenudi – sa collaboratzione cun s’amministratzione comunale de Otieri e s’interessu fitianu de s’assessore de sa Cultura Alessandro Tedde e de su sìndigu Marco Peralta chi ddis torramus gràtzias mannas»».
In s’assemblea, est istadu ammentadu fintzas su contributu de cabbale de su biadu de Gerolamo Squintu, chi cun sa passione e is ideas at sustentadu su Prèmiu giai dae is tempos de Tonino Ledda.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
