Un’òpera pro costoire unu regordu, trasformende su dolore in unu gestu de istima e de solidariedade. Est custu su significu de su murale inchingiadu sàbadu coladu in Irbono e dedicadu a Marco Mameli, su giòvanu de 22 annos mortu in Barì in su martzu de su 2025 in festa de Carrasegare.
Su ritratu, pintadu dae s’artista de Lanusè Aldo Marongiu in su muru de una domo de bia de Roma, naschet de un’initziativa de is amigos de Marco e de is obrerias 2002-1973, cun s’agiudu de is butegheris de sa bidda chi ant contribuidu a sa regorta de is fundos. Una partetzipatzione manna e ispontànea, bidu chi una borta regortu su dinari netzessàriu, at lòmpidu àteras rechestas de persones disigiosas de contribuire.
In su murale ddoe est Marco a braga in gropas a Ebano, su caddu chi dd’acumpangiaiat durante is festas e is professones. Unu sèberu acapiadu a una de is passiones prus caras a su giòvanu e a cussos momentos de festa chi aiat cumpartzidu cun is amigos e cun sa comunidade.
«Nos semus regordados chi a issu dd’agradaiat meda a organizare is festas in Irbono – at contadu s’amiga Aurora Sodde – e a partetzipare a is professones a caddu».
Sa fotografia chi at ispiradu s’òpera dd’at detzisa sa mama, Simona Campus, chi in un’intervista a su TG3 Sardigna at contadu sa dificultade de seberare s’immàgine giusta intre is medas fotos chi tenet de Marco. A s’agabbu sa mama at seberadu sa chi rapresentat de prus sa balia de su pitzocu: Marco a caddu de Ebano in sa professone in onore de sa Madonna de is Gràtzias.
Un’imàgine de issu in unu arratu de ispensamentu, de gosu e de gana de bìvere chi oe, a traessu de s’arte, est devènnida parte de su paisàgiu de Irbono.
Sa die de s’inauguratzione una pitica truma de gente s’est reunida a suta de su muru: parentes, amigos, conoschentes si sunt agatados pro cumpartzire unu momentu de amentu e bighinàntzia a sa famìlia. Su murale, illuminadu fintzas a note, dòminat s caminu printzipale de sa bidda, in bia de Roma.
«Est una ferta chi no at a curare mai. At coladu un’annu e mèdiu sena de Marco – at iscritu in is retes sotziales sa mama Simona – pro a nois unu tempus istremenadu. Bìdere custu murale pro nois est comente a torrare a bìdere sa lughe de sa bellesa sua pro mèdiu de is colores de sa bidda nostra».
Pro sa famìlia, s’òpera rapresentat unu modu pro mantènnere biu s’amentu de Marco e de ddi torrare a donare tretu in sa vida fitiana de sa comunidade.
«Dae immoe, totu is chi ant a colare in bia de Roma ant a pòdere pesare sa mirada e bìdere su risitu de Marco, dd’ant a pòdere castiare e saludare, ammentende sa bellesa e sa gana de bìvere sua. Dae oe, cun custu murale, su dolore lassat ispàtziu a sa gratitùdine».
Sa famìlia at bàlidu torrare gràtzias a totu is chi ant contribuidu a sa realizatzione de su progetu: is amigos, is cummertziantes, is comitados de is festas, is meres de s’abitatzione chi ant postu a disponimentu su muru e s’artista Aldo Marongiu.
«A nàrrere gràtzias seguru chi non bastat – at sutaliniadu Simona Campus – semus meda reconnoschentes a is chi ant partetzipadu a sa realizatzione de custa òpera meravigiosa».
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
