Sunt dies, custas, chi semus faghende sos contos cun undadas de calore inèditas. Unu calore estremu e perlongadu chi alimentat sa timòria de mudadas meteorològicas repentinas e violentas. E pròpiu in custas dies sa Regione at dadu a ischire chi at a tratare sa tecnologia pro rispòndere deretu a sas emergèntzias. S’istrategia regionale est presentada pro mèdiu de unu pianu de dòighi milliones de èuros, aprovadu in s’ùrtima variatzione de bilantzu, punnende a s’afortimentu de su monitoràgiu e a s’anàlisi preditiva de sos arriscos ambientales.
S’investimentu pro su biènniu 2027-2028 est articuladu ponende paris sa mobilidade aèrea de sos drones e su controllu satellitare. Sete milliones de èuros sunt destinados a su programma regionale Uas (Unmanned Aircraft System, est a nàrrere Sistema de aeromòbile a pilotàgiu remotu); chimbe milliones serbint imbetzes pro s’achirimentu de servìtzios satellitares avantzados.
Sa parte de su programma chi pertocat sos drones at a pònnere a sistema s’esperièntzia de sa Protetzione tzivile e de su Corpus forestale. Sos aeroplanos los ant a impreare pro prus de un’arriscu: dae s’abbistada primidia de sos fogos a sa chirca de persones ispèrdidas, finas a su controllu de su dissestu idrogeològicu, de sas risursas ìdricas e de sas costeras.
A custa flota volante b’ant a pònnere a costàgiu sos datos radar e òticos de osservatzione de sa Terra, integrados in una prataforma regionale ùnica de anàlisi preditiva. «Non nos interessat sa tecnologia ebbia. Nos interessat su chi issa permitit de connòschere in antis e su chi permitit a sos operadores de detzìdere mègius e prus a lestru», at naradu s’assessora regionale de sa Difesa de s’ambiente Rosanna Laconi. «Unu fogu individuadu in antis, una crititzidade idrogeològica lèghida cun prus pretzisione, una persone ispèrdida localizada cun lestresa podent mudare de su totu s’èsitu de un’interventu».
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
