Sa presentatzione pùblica est programmada pro mèrcuris chi benit, su 2 de santugaine a sas 5 de merie in sa sala consiliare de s’Unione de sos Comunes de su Monte Arvu, in Thiniscole. Ma giai dae como, in su situ internet de Locos de Cultura semus a tretu de bìdere materiale multimediale (immàgines, vìdeu e testos) de àteros noe logos de sas biddas de Bitzi, Lodè, Lùvula, Onanie, Orune, Osidde, Pasada, Thiniscole e Torpè: noe comunes ligados a pare dae una natura ìnnida e ispantosa, chi isparghent sa mirada issoro dae su mare a sos montes, cun nuscos e colores ammajadores covechende un’istèrrida de belle 821 chilòmetros in ue s’òmine b’at lassadu sas orminas dae sa preistòria.
Su progetu, finantziadu dae sa Regione in intro de sos interventos pro sa tutela de sa limba e de sa cultura sarda, in atuatzione de sas leges 22 de su 2018 e de sa 482 (istatale) de su 1999, si mustrat comente unu contu de biàgiu peri custas noe biddas chi ponent in evidèntzia sas galanias de sos paesàgios issoro, de sos logos de devotzione, de sos monumentos istòricos e de sas àreas de interessu archeològicu dende·li su prètziu chi meressent.
S’editzione colada sos logos fiant custos: su bidditzolu nuràgicu de Romanzesu in Bitzi; su logu de devotzione antigu de sa Purìssima in Lodè; su santuàriu de Santu Frantziscu de Lùvula cun sas duas festas suas de fide comunitària; sa crèsia de Santu Pretu de Onanie, prenda minuda de architetura romànica; su situ misteriosu de Sant’Efis in Orune; sos tretos de S’Iscopalzu in Osidde cun su nuraghe in cue imponente; su Casteddu de sa Fae cun s’ammaju suo in Pasada; sa turre de bàrdia seculare e mai istraca de Santa Luchia de Thiniscole; su nuraghe Santu Pedru de Torpè, bastione imponente e marcu ingeniosu de sa gente antiga.
Ocannu su sèberu nch’est rutu in àteras noe prendas de custu territòriu: su Museu de sos massajos e de sos pastores de Bitzi (unu biàgiu in su tempus sighende sas istigas de una sabidoria antiga); sa cala de sos naneddos de Janna Oriavula de Lodè (chi testimòniat paristòrias antigas cun raighinas fundudas); sa creja de sos Ànzelos de Lùvula (una prenda in su coro de unu bighinadu antigu); su novenàriu de Santu Bachis de Onanie (ue fide e traditzione andant a manu tenta); sa creja de Santa Maria de Orune (cun sa bellesa ispantosa de una religiosidade contada cun pinturas universales); sa tumba de sos gigantes de “Sa Raighina” in Osidde (una sepultura in su coro de unu padente de suèrgios e chercos); sa turre de Santu Juanne de Pasada (in colore de rosa posta a bàrdia de s’orizonte); sa tumba de sos zigantes de “Su Picante” in Thiniscole (un’àidu pro intrare a unu mundu mìsticu e segretu); su museu tzìvicu de Torpè (ue podimus sighire su caminu de unu pòpulu conca a su benidore).
S’Unione de sos Comunes est sa summa de custas noe biddas postas a nord est de Sardigna e chi sunt parte de regiones istòricas e geogràficas diferentes (intre Barbàgia e Baronias). “Locos de cultura” si presentat comente «un’invitu pro chi las isperiemus sas intragnas de unu logu tentadu dae su mare incantadore, dae sos ispigros armoniosos de sas zonas ùmidas, dae sos padros losanos rugrados dae su riu Pasada e dae sa pomposidade de sas cristas carronadas e de sas trempas carcàreas de su Monte Arvu».
In prus de sas brossuras e de su vìdeu, finamentas sos pannellos de allumìniu sunt parte de su progetu. Pannellos chi los ant a pònnere in sos logos mentovados dende valore a su situ matessi e a sa limba sarda chi nde contat s’istòria.
A sa presentatzione de mèrcuris b’ant a leare parte sos dipendentes de s’Àrea amministrativa de s’Unione de sos Comunes, s’operadora audiovisiva Silvia Punzo, su fotògrafu Alex Cucchi e sa giornalista Mariantonietta Piga, autora de sos testos.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
