Su Cunsìgiu comunale de Àrthana, tenende contu de s’aberidura istòrica de sa comunidade cara a is realidades serentes de su Gennargentu e de is territòrios totu a ingìriu, at aprovadu a s’unanimidade una motzione a sustennu de su pòpulu palestinesu. Su documentu invitat is istitutziones de cada nivellu a garantire is deretos fundamentales e su respetu de su deretu internatzionale, promovende una solutzione de paghe chi asseguret a sa Palestina su deretu a s’autodeterminatzione, in unu cuntestu de istabilidade, diàlogu e collaboratzione intre is pòpulos.
In sa discussione, su cunsigeri Fulvio Michele Sioni at postu a notu is arriscos de s’estremizatzione de is positziones polìticas: “cuntierras e polarizatziones ponent in perìgulu tziviles, ambiente e isvilupu culturale, sotziale e econòmicu, trasformende risursas e progressu in trastos de gherra”.
Sa dibata ant pertocadu fintzas su cuntestu geopolìticu globale, cun riferimentu a is àteras gherras comente in Ucràina, Sudan e Mozambicu, e a situatziones de tensione in Nord Àfrica, Lìbia e Egitu, in prus sa cunditzione de armenos, curdos e afganos.
Dae su cunfrontu nd’est essida a pìgiu sa netzessidade chi is comunidades locales tèngiant unu ruolu ativu in sa promotzione de sa giustìtzia e de sa paghe, tenende a pòmpiu e ponende a s’atentu de is istitutziones is rechestas de is tzitadinos, a manera de afortiare su protzessu democràticu e sa defensa de is deretos umanos.
«Pro sa comunidade nostra sa paghe e su respetu de is deretos fundamentales non tenent làcanas- at naradu su sìndigu Angelo Ivano Stochino – Àrthana s’aunit a chie in su mundu pedit diàlogu, cooperatzione e solutziones giustas e de dura, pro more chi is pòpulos potzant bìvere in seguridade e cun dignidade», at decraradu su primu tzitadinu.
S’atentzione de sa bidda de Àrthana a su chi est acontessende in Palestina fiat giai essida a campu cando custa istade is obreris de sa leva 1995 ant espostu sa bandera palestinesa in totu is dies de sa festa in onore de Santu Fisente, pro protestare contra a su genotzìdiu. In austu, imbetzes, in Perdas Crapias, sa punta prus arta de su Gennargentu, una truma de escursionistas abarradu anònimu, at postu sa matessi bandera a pees de sa rughe.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
