Aprovadu su testu unificadu in contu de governance governance. S’idea est de nde fàghere sa ferrovia turìstica prus manna de Europa comente crae pro s’isvilupu de sa Sardigna de intro.
Semàforu birde dae parte de ambas coalitzione pro su benidore de unu de sos patrimònios prus istratègicos de Sardigna, su Treninu birde. Sa IV Cummissione de su Cussìgiu regionale at aprovadu cun votu unànime su Testu unificadu atzelerende sa torrada a nou definitiva de s’infrastrutura turìstica chi si nch’isterret pro prus de 400 chilòmetros in sas intragnas de s’ìsula.
Su Treninu, sa ferrovia turìstica prus manna de Europa, fiat firmu dae tempus pro more de unu mantenimentu non bastante e de una governance precària, mancari su potentziale suo comente volanu pro s’economia de sas partes de intro (Barbàgia, Ogiastra, Sulcis).
Su Testu legislativu nou punnat a nche barigare custas crititzidades introduende unu modellu de gestione prus mannu e partetzipadu. Sa riforma afòrtiat sa Fondazione Trenino Verde e nde torrat a definire s’istrutura detzisionale. Sa novidade prus de importu est s’istitutzione de una Giunta esecutiva prus operativa, chi no at a bìdere petzi sa partetzipatzione direta de sa Regione e de s’Arst, s’azienda regionale de trasportu pùblicu, ma fintzas de bator sìndigos in rapresentàntzia de sos territòrios rugrados dae sas lìnias. Custu diat dèvere garantire chi sas detzisiones in contu de gestione e de valorizatzione de su patrimòniu siant pigadas movende dae sos bisòngios locales.
Sa lege faeddat finamentas de sa netzessidade de pònnere in seguresa sas tratas prus difìtziles (comente sa Lanusè-Seui) e de pianificare interventos de reimpreu pro mèdiu de de risorsas regionales e europeas.
S’obietivu primàriu est su de trasformare su Treninu birde dae una risorsa potentziale e precària a agiudu cuncretu pro su turismu pàsidu e identitàriu, fintzas cun sa punna de cuntrastare s’ispopulamentu. Como su testu essidu·nde dae sa Cummussione est prontu pro s’allega e s’aprovatzione in àula.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
