Is normas noas in contu de seguridade introduidas dae su decretu de su Ministèriu de s’Isport, connotu comente decretu Abodi, a pagas dies dae carrasegare, ant torradu a pònnere fogu intre istitutziones, organizadores e assòtzios pro s’amparu de is animales. Manifestatziones comente sa Sartìglia de Aristanis, Sa Carrela ‘e nanti de Santu Lussùrgiu, e fintzas s’Ardia de Sèdilu, oe si depent adeguare a règulas prus severas pro sa seguridade de cadderis, caddos e pùblicu.
A betare linna a su fogu est fintzas s’interventu de s’Ihp Italian Horse Protection, chi at difèndidu su decretu ministeriale critichende a chie pedit dèrogas de is normas. Su presidente de s’Ihp, Sonny Richichi, at torradu isceda a is declaratziones de su cunsigeri regionale Alessandro Solinas, chi aiat propostu una norma ispetziale pro sarvare is traditziones ecuestres corpidas dae su decretu.
Su presidente de s’assòtziu at allegadu de “arrogàntzia istitutzionale”, denuntziende sa voluntade de unos cantos grèmios de non respetare is règulas noas. «Nisciuna traditzione podet pònnere in perìgulu sa vida e su benèssere de is animales», at naradu Richichi, meletzende denùntzias pro chie no at a repsetare is règulas noas.
Oe puru, a pustis de chimbe oras de cunfrontu in Prefetura, is organizadores de sa Sartìglia no ant agatadu perunu acòrdiu cun Cummissione provintziale de vigilàntzia. Su Prefetu, difatis at cunfirmadu s’òbrigu de impreare su cascu, mentras su Comunu de Aristanis e sa Fundatzione Oristano sunt abarrados de s’idea chi tocat a imbetzes a rispetare sa traditzione, ponent de fintzas in duda sa cumpatibilidade intre caratza e cascu, cunsideradu fintzas prus perigulosu.
Pro s’ora peruna comunicatzione ufitziale est arribbada dae sa Prefetura, mentras Comunu e Fundatzione ant fatu unu comunicadu aunidu cunfirmende sa positzione issoro e annuntziende s’intentzione de sighire in su cunfrontu pro tutelare traditzione, legalidade e seguridade.
Unu sinnale de diàlogu est lòmpidu dae Santu Lussùrgiu. Sa Carrela ’e nanti, difatis, s’at a cùrrere rispetende su decretu Abodi, sena rinuntziare però s’identidade sua. Dae domìniga 15 a martis 17 de freàrgiu, is cadderis ant a pònnere cascos e corpetos amparadores, cuados suta de is caratzas e de is bestimentas traditzionales.
Su tempus sighit a colare e, a pagas chidas dae sa Sartìglia, sa chistione de sa seguridade abarrat aberta. In su mentres tempus, in is retes sotziales girant memes irònicos cun immàgines de cadderis custrintos a bestire cascos de mototziclista. Pagu is brullas.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
