Sunt 61 sas pellìculas de 18 paisos de su mundu chi dae s’8 a su 13 de làmpadas sunt protagonistas de sa de noe editziones de su Babel film festival. Est gasi chi, in sos ispàtzios de s’Exmà de carrera casteddaja de Santu Lutzìferu, pigat forma su cuncursu tzinematogràficu internatzionale dedicadu pro intreu a sas produtziones chi dant boghe a sas minorias linguìsticas e culturales. De custas 61 pellìculas 19 sunt sos metràgios longos, 33 sos curtzos e 9 sos documentàrios. E 38 sunt sas limbas impreadas in custas fainas.
In intro de su Babel b’at logu mannu pro sas produtziones in limba sarda, comintzende dae duos film in foras de cuncursu: “Chie chircat accattat” de Enrico Pau (in contu de limbàgiu e consumu) e “Seu innoi” de Andrea Deidda (una mirada poètica cun in intro memòria e identidade).
In cumpetitzione bi sunt imbetzes “Tres animeddas” de Matteo Incollu (chi si nch’imberghet in su noir cun tràgiu risulanu), “In su corru ‘e sa furca” de Davide Melis (unu docufilm porroghende sa Sardigna de oe dae sas mesas de unu tzilleri), “Su fatorgiu” de Alonso Crespo (un’istòria chi movet dae su tempus colende e dae sa vida de cada die pro mèdiu de sa mirada de duas fèminas), “Frarìa” de Alberto Deiana (chi contat s’istòria de unu pitzocu faghende·si òmine in sos tempos chi abereint sas ghennas a su fascismu), “Goppà” de Roberto Pili (cun protagonistas duos betzos e su tempus coladu criminale issoro).
In su cartellone finas “La punizione del prete” de Francesco Tomba e de Chiara Tesser (dae unu contu populare gadduresu), “S’ozzastru” de Carolina Melis (film de animatzione in onore a s’ogiastru de Cùglieri, sìmbulu de resistèntzia a su fogu postu) e “Abele” de Fabian Volti (in ue su pastoriu est unu ponte intre Sardigna e Palestina). Chimbe sas pellìculas in sas setziones a costàgiu: “Il pescatore” de Ugo Garau, “S’orcu” de Antoni Conzu, “Isola” de Giulia Fo, “Falamus” de Paolo Lubinu e “Si seus accappiaus” de Simone Paderi.
Sa limba sarda nch’est fintzas in intro de unu cunvegnu in programma pro chenàbura su 13, a ora de sas 10 in sa Sala cunferèntzias. Custu su tìtulu: “Articolo 6. Il futuro delle minoranze linguistiche in Italia”. S’adòòbiu lu coordinat Enrico Lobina in pare cun Sabrina Rasom (diretora de s’Istitutu culturale ladinu de San Giovanni di Fassa), Pantaleo Rielli (presidente de su Parcu turìsticu culturale Palmieri de Martignano), Leo Virgili (presidente de s’assòtziu Inniò de Ùdine) e Tore Cubeddu (diretore de Ejatv de Casteddu).
In intro de sa Babel Academy su fèstival proponet tres masterclass, cun apuntamentos a sas 10 (semper in sos ispàtzios de s’Exmà) cuidados dae firmas de vàllia de su panorama tzinematogràficu italianu comente Massimo D’Anolfi (cun “Il documentario come ricerca”), Marco Antonio Pani (cun “Il cinema tra sogno e poesia”), Tizza Covi e Rainer Frimmel (cun “La realtà e la sua rappresentazione”). In programma fintzas addòbios de formatzione e apuntamentos pro pitzinnas e pitzinnos.
Sa giuria ufitziale de su fèstival est ghiada dae su giai mentovadu regista casteddaju Enrico Pau. In pare cun issu sa regista Julie Perreard, sa linguista Sabrina Rasom, su regista Alessandro Gagliardo e sa documentarista Monica Dovarch.
Batòrdighi sos prèmios assignados dae 12 giurias pro unu monteprèmios cumplessivu de 16.500 èuros. Su fèstival, dirìgidu dae Antonello Zanda e Paolo Carboni, est e promòvidu dae su Tzentru servìtzios culturales de sa Sotziedade umanitària de Casteddu – Cineteca sarda, cun s’agiudu de sa Regione, de su Comune de Casteddu e de sa Fondazione Sardegna Film Commission. Su programma intreu est publicadu in situ internet https://www.babelfilmfestival.com/
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
