Su printzipale addòbiu iscientìficu italianu in contu de Digital humanities (campu de istùdios interdisciplinàriu chi aunit sas disciplinas umanìsticas a sos istrumentos e a sas metodologias tecnològicas) lompet a Sardigna. Dae su 3 a su 5 làmpadas, s’Universidade de Casteddu òspitat su de bìndighi cunvegnos annuales de s’Aiucd, s’assòtziu pro s’informàtica umanìstica e sa cultura digitale.
Organizadu dae su tzentru de ateneu Dh UniCa, s’eventu ponet comente elementu tzentrale de sa dibata unu tema detzisivu pro su tempus benidore de sa cultura: comente sa chirca umanìstica potzat operare in forma cuncreta in sa sotziedade pro mèdiu de sas tecnologias digitales. Su chiu de custa editzione, intitulada “Digitale e Public engagement: pràticas e prospetivas in sas Digital humanities”, at a esplorare difatis su raportu intre acadèmia e territòriu, promovende sa partetzipatzione ativa de sos tzitadinos.
In sas tres dies de traballos s’ant a intreverare sessiones iscientìficas e momentos de networking ghiados dae sos General chair Giampaolo Salice e Cristina Marras. Sos espertos s’ant a cunfrontare in contu de pràticas innovativas comente su crowdsourcing, sa co-creatzione cun sas comunidades, s’archiviatzione virtuale, sa citizen science e s’aplicatzione de s’intelligèntzia artifitziale in sas disciplinas umanìsticas.
Sìmbulu tangìbile de custa ispinta conca a s’inclusione at a èssere Noa, un’assistente digitale integradu in su situ de su cunvegnu pro orientare su pùblicu intre sos addòbios e sa tzitade. S’eventu, chi previdet sa publicatzione de sos atos in open access e s’assegnatzione de sos prèmios Gigliozzi a sos giòvanos chircadores, coronat unu percursu ammaniadore de webinar e lompet in unu momentu particulare pro s’Aiucd. S’assòtziu at difatis consolidadu su prestìgiu internatzionale suo intrende a su board de s’Alliance of Digital Humanities Organizations.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
