Tra su consumu bulìmicu de sa fast fashion chi isfiadat su praneta e s’umbra grae de un’economia globale chi punnat a sas gherras e a sa carbonizatzione manantiale, sa Terra brujat duas bortas: suta sos corfos de s’incuinamentu tèssile e suta de sas bombas. Sas rispostas a custa distrutzione sistemàtica, chi aunit crisi climàtica e crisi sotziale, podent dare sos resurtados suos cun un unu càmbiu radicale e globale de paradigma.
Ma fintzas comintzende dae su livellu locale, da sa bases de sas comunidades de Sardigna. In Tàtari, pro nàrrere (e abarrende in tema), sunt torrende a tèssere sos filos de sa solidariedade comunitària. In unu cuntestu semper prus marcadu dae su caru–vida e dae sas tensiones internatzionales, s’assòtziu Sa Domo de Totus torrat a propònnere su Clothes Sharing, un’initziativa chi aunit mutualismu cuncretu e economia tzirculare, trasformende unu gestu ùmile comente s’iscàmbiu de bestires in una pràtica polìtica e sotziale.
No est benefitzèntzia, ma unu modellu alternativu chi movet dae sos cuntzetos de cooperatzione, educatzione e dignidade. Un’ispàtziu abertu e inclusivu, in sos locales de carrera de Frigaglia 14b, ue chie si siat podet giùghere bestires istiales in cunditziones bonas e pighende·si a s’indonu su chi li bisòngiat.
S’apuntamentu pro sa collida de sos bestires est su 3 de làmpadas (dae sas 10 a sa una e de sas bator a sas oto), mentras su 5 e 6 làmpadas, a oràrios che pare, sunt sas dies programmadas pro s’iscàmbiu.
S’initziativa nch’est in intro de una fase istòrica in ue sas cuntierras e su riarmu pesant in sas butzacas de sas famìlias sardas. Comente sutalìniat sa presidente de Sa Domo de Totus, Vanna Cimino, «sa gherra e su riarmu, sustènnidos fintzas dae su guvernu nostru, costant finas a milli èuros a s’annu a famìlia. Custu est unu datu cuncretu chi influit in sa vida fitiana de sas persones. Su Clothes Sharing est su modu pràticu nostru pro dimustrare chi un’alternativa est possìbile: fraighende solidariedade, re-impreu e comunidade contra s’economia de gherra e contra a unu sistema chi càrrigat sos costos a sas classes populares».
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
