Est essidu su primu nùmeru de «Noas dae s’ispidale», su periòdicu mensile contivigiadu dae s’isportellu linguìsticu de s’ASL Ogliastra. Sa rivista, iscrita totu in sardu, est pensada pro informare sa tzitadinàntzia in contu de is initziativas de s’ASL Ogliastra e de is fainas suas in su territòriu.
Su periòdicu, curadu dae is operadores linguìsticos etotu, est a disponimentu de totus in formadu digitale e est publicadu fintzas in formadu cartàtzeu petzi pro is aposentos de isetu de s’Ospidale Nostra Sennora de sa Mercede e pro sa Domo de Comunidade de Lanusè.
«Noas dae s’ispidale» proponet unu amesturu de informatzione, atualidade e aprofondimentos, cun noas de crònaca, innovatziones in àmbitu sanitàriu, cunsìgios pràticos pro is patzientes e argumentos dedicados a sa cultura, a is curiosidades e a s’istòria de sa sanidade locale.
In su primu nùmeru s’allegat de su progetu «Su sardu in corsia», chi rapresentat un’initziativa importante pro sa promotzione de sa limba sarda in is servìtzios sanitàrios de s’ASL Ogliastra, utilizende su sardu comente trastu de acasàgiu e de informatzione pro is patzientes.
Tra is àteros temas afrontados ddoe est fintzas s’innovatzione mèdica, cun unu aprofondimentu in contu de su primu interventu chirùrgicu a su mundu esecutadu cun s’agiudu de robots umanòides, e is iscàmbios internatzionales, cun s’arribu a Lanusè de 10 istudiantes de meighina dae sa Polònia, acòllidos in s’ospidale ogiastrinu pro sa formatzione issoro.
Particulare atentzioni est dedicada fintzas a sa preventzione, cun un’artìculu chi pertocat s’ativatzione de su «Pianu contra su calore» de s’ASL Ogliastra e is cunsìgios de su Ministèriu de sa Salude pro parare fronte is undadas de calore de s’istade.
A su patrimòniu de memòria e istòria locale est intregada un’àtera parte de su periòdicu, cun sa presentada de su progetu de su libru fotogràficu «S’ispidale de s’Ogiastra» e unu regordu, in sa rubrica «Òmines e fèminas de cabbale», a su dotore pediatra arthanesu Piero Balzano, ammentadu dae totus comente su «mèigu de is pipios».
Cun «Noas dae s’ispidale», s’isportellu linguìsticu de s’ASL Ogliastra proponet duncas unu trastu nou de informatzione e de promotzione de sa limba sarda, capatzu de informare is patzientes e sa comunidade de totu is initziativas de s’azienda sanitària ogiastrina, sena trascurare sa cultura, is curiosidades e s’istòria de su territòriu.
Leghe o iscàrriga Noas dae s’ispidale
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
