Su tres de martzu sa fundatzione Domus de Luna festat su de binti anniversàrios: duas dècadas de aficu pro agiudare pipios e famìlias bisongiosas.
Fundada in su 2005 in Casteddu dae Ugo Bressanello e Petra Paolini, Domus de Luna at creadu unu modellu nou chi ponet in paris comunidades familiares pro minores in dificultade cun assistèntzia sotziale e percursos de inclusione, de traballu pro giòvanos e prus mannos, cun s’obietivu de trasformare sa fragilidade in una risursa.
Nàschida a pustis de sa serrada de is orfanotròfios, Domus de Luna s’òcupat de pipios e mamas in dificultade e vìtimas de maltratamentos. Is comunidades de Casa delle Stelle acollint minores istesiados dae is famìlias e mamas cun pipios bisongiosos de agiudu. In binti annos, is comunidades ant acasagiadu prus de 300 minores mentras is professionistas de “Sa Domu Pitticca” ant agiudadu prus de 500 pipios cun is famìlias issoro.
Posca gràtzias a sa fundatzione sunt naschidas “TiAbbraccio”, su “Teatro Dante”, sa “Polisportiva Popolare”, “l’Altra Galleria”, “Casa Futuro” cun “Codice Segreto”. In paris cun sa “Locanda”, su “Circolo e il Rifugio dei Buoni e Cattivi”. In is ùrtimos annos “L’Oasi WWF del Cervo e della Luna” e sa “Fattoria Molto Sociale” chirchende de coniugare incuru pro s’ambiente e riscatu sotziale.
“Cando cun Petra giraìamus pro is ufìtzios – iscriet Bressanello -, cando contaìamus su chi fìamus faghende, sa risposta fiat ‘Bois bolides sa luna’. Fiat devènnida una frase repìtida dae is chi nche naraiant de bolare prus a bàsciu, de replicare modellos chi giai esistiant. Pro custu sa fundatzione, a sa cale aiant aderidu in deretura medas amigos, nd’amus mutida Domus de Luna”.
Unu traballu pretziosu nàschidu in Casteddu e reconnotu dae is istitutziones. Su presidente de sa Repùblica Sergio Mattarella, pro mèdiu de su segretàriu generale, at espressadu aprètziu pro su traballu de Domus de Luna: “S’aficu continu pro promòvere sa dignidade e su benidore de persones e famìlias testimòniat is valores prus profundos de sa Costitutzione nostra e s’òpera bostra de solidariedade, acasàgiu e inclusione, rapresentat un’esèmpiu de importu mannu de aficu tzivile e sotziale”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
