S’est concruidu eris cun grandu ispera pro s’editzione 2026 su Giru de Sardigna, torradu ocannu in is caminos sardos a pustis de bìndighi annos chi mancaiat. Sa cursa tziclìstica, partzida in chimbe tapas dae su 25 de freàrgiu a su 1 de martzu, at rugradu bona parte de sa Sardigna, faghende connòschere a su pùblicu natzionale e internatzionale ist bellesas de s’ìsula.
Sa de trinta editziones dd’at su tziclista vicentinu Filippo Zana, detzisivu mescamente in sa tapa prus matanosa de sa gara. S’ùrtima fratzione, mòvida dae Nùgoro cun arribbada a Terranoa, dd’at bìnchida su giòvanu brescianu Davide Donati. A sa tzerimònia de premiatziones, semper in Terranoa, fiat presente sa presidenta de sa Regione Sardigna, Alessandra Todde, chi at cunfirmadu s’importu de s’eventu: «Amus a sustentare galu de Sardigna. Nos bidimus s’imbennnu».
Giai a sa partèntzia de s’ùrtima tapa, Todde aiat ispiegadu s’importu de custa cursa pro s’Ìsula. «Su tziclismu est un’isport populare: totus ddu podent sighire, tifare e partetzipare. Est giustu chi sa Sardigna torret protagonista», at naradu, ammentende chi eventos isportivos che a custu agiuant fintzas a fàghere connòschere su territòriu.
Sa Regione at sustentadu sa gara cun un’investimentu de duos milliones de èuros pro mèdiu de s’assessoradu a su Turismu. Gràtzias a is diretas televisivas natzionales e internatzionales, milliones de persones ant pòdidu bìdere is paisàgios sardos, is biddas, is monumentos e is sitos archeològicos, comente is Domus de Janas, oe patrimòniu UNESCO. Tando, su Giru est istadu fintzas una grandu ocasione de promotzione turìstica.
Importante fintzas sa presèntzia de Ignazio Cireddu de Santu Idu, ùnicu atleta sardu in gara, retzidu cun entusiasmu a sa partèntzia dae Nùgoro. Sa partetzipatzione sua, paris cun s’amentu de is resessidas de su campione Fabio Aru, rapresentat un’istìmulu pro is giòvanos sardos chi si bolent apresiare a su tziclismu.
Su bilantzu finale andat tando in prus addae de s’isport: sa torrada de su Giru de Sardigna at unidu cumpetitzione, promotzione de su territòriu e economia locale. Como s’obietivu est rèndere sa cursa un’addòbiu fitivu de su tziclismu internatzionale, capatzu de interessare semper prus totu s’Ìsula in is annos benidores.
Non sunt mancadas però unas cantas discussiones pro su percursu seberadu in custa editzione, chi segundu unos cantos amministradores locales at dadu prus tretu a is biddas costerinas. Daniela Falconi, sìndiga de Fonne e presidente de Anci Sardegna, a ogna contu at sutaliniadu su ruolu importante de is comunos chi ant collaboradu a s’organizatzione. «Su Giru est una grandu oportunidade pro fàghere connòschere sa Sardigna e agiuare su turismu fintzas in s’istajone bàscia», at ispiegadu.
Falconi at ammentadu chi is comunos de Fonne e Gavoi ant acasagiadu diversas dies sa carovana de su Giru cumposta dae unas milli persones intre atletas e iscuadras. Albergos e ristorantes locales ant acollidu a totus dimustrende de pòdere gestire eventos de grandu livellu a tot’annu. «Mancari non fìamus in is imàgines televisivas, amus a sighire a fàghere sa parte nostra cun responsabilidade e collaboratzione», at agiuntu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
