Su sardu, faeddende in custu casu de chie naschet in Sardigna, forsis in su benidore non at esìstere prus. Custa como podet èssere pigada che a provocatzione ma si is datos de is nàschidas sighint a calare, comente acontessit in is ùrtimos annos, sa realidade diat èssere un’àtera.
S’ìsula est ùrtima in Itàlia in sa classifica de sa natalidade cun unu nùmeru de fìgios pro cada fèmina de 0,91. Duncas faghende sa mèdia no naschet mancu unu fìgiu pro fèmina. Su datu arribbat dae s’Istat, s’Istitutu de statìstica natzionale chi sutalìniat finas comente sa Sardigna sighit a pèrdere abitantes (-5,8 cada mìgia respetu a su 2023) e est ùrtima pro su nùmeru de pitzocos e pitzocas a suta de deghechimbe annos. Andat male finas s’isperu de vida chi calat de 1,7% dae su 2023: una bèfa pro sa terra de is tzentenàrios.
“Ocannu est comente chi amus pèrdidu sa tzitade de Macumere”. Ddoe narat Mauro Carta su presidente regionale de s’Acli assòtzios cristianos de is traballadores italianos. In prus, narat, sighit a calare sa populatzione ativa, sa chi trabballat e sustenit su sistema sotziale pùbblicu, e creschet sade is betzos. “Is datos mustrant chi is mortos dòpiant is nàschidas, s’ùnicu datu positivu est su contu migratòriu cun s’esteru”.
“Pro chircare de cambiare custu andamentu – sighit Carta – serbint interventos de perìodu mèdiu e longu. Bisòngiat garantire istipendios prus artos mescamente in is appaltos pùbblicos de su setore de sa sanidade e de is servìtzios generales. Tocat finas crèschere s’innovatzione tecnologica de sa Regione puntende a su progetu de s’Einstein Telescope chi podet serbire finas pro s’Intelligentzia Artifitziale”.
“In fines – afirmat – est craru chi sa cura de is pessones at a èssere unu setore de trabballu semper prus de importu, tando tocat formare sardos o atràere famìlias dae s’èsteru, prusaprestu chi sìngulos traballadores: est unu percursu istruturale chi andat costruidu”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
