Est istadu su reading istòricu-musicale “Su contu de sa Sarda Rivolutzione” su momentu prus intensu e de s’eventu Sa Die de sa Sardigna 2026 andadu a iscena eris a mangianu in su Teatru San Frantziscu de Tortolì. Un’addòbiu capatzu de aunire narratzione e mùsica, ponende a su tzentru sa memòria istòrica e s’identidade de su pòpulu sardu.
Protagonistas in su palcu s’iscritore e sagista Omar Onnis, rèdutze de sa manifestatzione organizada dae s’Assemblea Natzionale Sarda in Casteddu pro su 28 de abrile, e s’artista sonoru Francesco Medda “Arrogalla”, de torrada issu puru dae su cuntzertu in pratza de su Carmine, semper in Casteddu, paris cun su Tenore de Orosei, in s’àmbitu de is initziativas promòvidas dae sa Ras pro Sa Die. In Tortolì, is duos artistas ant propostu un’ispetàculu de divulgatzione istòrica modernu e atzessìbile, chi at acumpangiadu su pùblicu in intro de is fatos printzipales de su triènniu rivolutzionàriu sardu pro mèdiu de is fontes, is personàgios e is testimonias de s’època.
Is faeddos de Onnis, dae annos impinnadu in sa chirca e in sa difusione de s’istòria sarda, si nche sunt atritzadas cun is sonos evocativos e cuntemporàneas de Arrogalla, creende un’esperièntzia immersiva capatza de faeddare fintzas a is levas noas.
Sa die, organizada dae s’assessoradu a sa cultura ghiadu dae Rita Cocco, s’est aberta cun is notas de is launeddas de Alessandro Podda, sighidas dae is saludos istitutzionales de su sìndigu Marcello Ladu, chi at bòlidu sutalineare s’importu de is tzelebratziones de Sa Die comente momentu fundamentale pro s’afortziamentu identitàriu de is giòvanos.
Significativa sa partetzipatzione de is tertzas e cuartas classes de is istitutos professionales IANAS, acumpangiadas dae dotzentes e famìlias. Su vitze prèside Giovanni Idili at sutaliniadu s’importu de interessare is istudiantes in initziativas che a custa, ùtiles pro su connoschimentu de s’istòria isulana.
No est mancadu su contributu de su Cuncordu de Arbatassa, dirìgidu dae Luisa Balzano, chi at esecutadu su càntigu famadu “Procurade ‘e moderare”, innu ufitziale de sa Sardigna e sìmbulu de sa Rivolutzione Sarda.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
