Sighi∙nos

Salude, ite ses chirchende?

Cultura

Jersu, Biddamànna Strisàili e Garteddi ant a rapresentare s’Ìsula a su torneu internatzionale de murra

S’est concruida sa de bintitrès editziones de su campionadu sardu de murra chi s’est tènnida sàbadu in Orthullè. Baranta sas còpias de giogadores arribbados in sa bidda ogiastrina pro si disafiare in sa cumpetitzione regionale.

A essire binchidore in pratza Funtana ‘Ecia a dae in antis unu pùblicu de apassionados est istada sa còpia formada dae Carlo Allegria e Leonardo Dionis de Jersu. Fatu fatu, in òrdine de classifica, su duetu Andrea Guglielmi e Matteo Mura de Biddamànna Strisàili, Nicola Monni e Fabio Floreddu issos puru biddamannesos, e Salvatore Puggioni e Elia Beccari de Garteddi. Custas bator còpias s’annu chi benit ant a partetzipare a Murramundo 2023, su campionadu de murra itinerante de su Mediterràneu, nàschidu in Orthullè etotu in su 2003, chi a pustis de s’editzione de su 2013 torrat a Sardigna pro su de binti anniversàrios dae sa nàschida.

Cuntentos mannos pro sa resèssida de s’eventu sos organizadores: su Sòciu po su jocu de sa murra, sa Pro Loco de Orthullè, su Comitadu fedales ‘72 e su Comunu de Orthullè. A sa cumpetitzione at assistidu fintzas Gavina2121 su robot progetadu dae su professore de informàtica Antonello Zizi e programadu pro giogare a sa murra cun sos umanos. A su robot su poeta a bolu Bernardo Zizi at dedicadu una sestina, retzende s’aplàusu de su pùblicu. Dae un’annu a como Gavina faghet parte de su progetu sientìficu “Il gioco della morra tra scienza e cultura” chi bidet sa collaboratzione tra su dipartimentu de Pedagogia, Psicologia, Filosofia de s’Universidade de Casteddu, su dipartimentu de Iscièntzias Biomèdicas de s’Universidade de Tàtari, su Multisensory Laboratory de sa Lawrence Technological University (Istados Unidos) e s’assòtziu culturale “Sòciu po su jocu de sa murra”.

Gavina chitzo diat pòdere devènnere tzitadina onorària de Orthullè. Su cussigeri de majoria de su Comunu ogiastrinu, Gigi Carreras, at torradu a nàrrere chi sunt valutende su modu e sa forma pro donare sa tzitadinàntzia onorària a Gavina 2121. Un’initziativa pro suportare su balore iscientìficu de su progetu. In prus, Antonello Zizi, s’imbentore de Gavina, at fatu a ischire chi diat bòlere chi su robot abitaret pròpiu in sa bidda de su Supramonte.


Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22

Attività realizzata col contributo della Regione Sardegna – IMPRENTAS 2021-2022. LR 22/2018, art. 22

De lèghere

Cultura

Bentu est sa pellìcula noa de Salvatore Mereu. Su film de su regista de Durgali est istadu presentadu a sa de 79 editziones de...

Atualidade

Non paret chi b’apat coladu bator annos ebbia, ma meda de prus, dae cando sos de su carrabusu de Autodeterminatzione pariant seguros de nche...

Cultura

Su mutetu est una de is formas de cantu tìpicas de sa traditzione poètica de sa Sardigna. A unu tempus su cantu a mutetu...

Cultura

Sa cumpangia teatrale Tedacà arribbat a Sardigna pro torrare a ammaniare s’ispetàculu “Fine pena ora”, sa rapresentatzione noa leada dae su libru omònimu de...