Vitzi, sa gara a sa solidariedade de is sardos pro torrare a partire Est partida una regorta de fundos ufitziale, pro pòdere superare is crititzidades dèpidas a s'undamentu chi at corfidu sa bidda de sa provìntzia de Nùgoro.

Vitzi. Foto dae: pàgina Fb de Forestas (Cristian Mascia et al.)
Vitzi. Foto dae: pàgina Fb de Forestas (Cristian Mascia et al.)

Is immàgines de s’alluvione terrorosa chi su 28 de santandria at bisestradu Vitzi, provochende tres mortos, ant fatu su giru de s’Itàlia. E tando, pro sa bidda barbaritzina s’est posta in movimentu sa màchina de sa solidariedade, e meda gente at bòlidu fàghere intèndere sa bighinàntzia sua.

In deretura, pagora a pustis de su disacatu, medas tzitadinos sardos ant cuntatadu s’amministratzione comunale de Vitzi pro donare benes de primària netzessidade e dinari. Est partida in prus una regorta de fundos ufitziale, cramada #TUTTIconBITTI, pro pòdere superare is crititzidades dèpidas a s’undamentu chi at corfidu sa bidda de sa provìntzia de Nùgoro.

Pro chie imbetzes pro agiudare sa populatzione de Vitzi tenet intentzione de donare benes e materiales, sa pàgina Facebook de sa Comuna at fatu a ischire chi “pro agiudare is iscuadras de is operadores e de is voluntàrios impinnados in is traballos pro sa posta in seguridade e su sucursu serbint: guantes, incherados, varechina, mascareddas FFP2 e disinfetante pro is manos. E posca ròtulos de tiàgias de paperi, pratos, tassas, furchetas e culleras de plàstica, tiagiolas de paperi, paperi igiènicu, iscovas, palitas e detersivos. Non serbint imbetzes giogos, pannolinos, omogenizados, merendinas o alimentos chi coitant a s’ispèrdere. Non mancant bestires, lentzolos e asciugamanos”.

Fintzas sa diòtzesi de Nùgoro at abertu una sutiscritzione de solidariedade pro sa comunidade de Vitzi, impinnende·si a fàghere, cada chida, unu rendicontu de totu su dinari chi at a arribbare pro s’emergèntzia. Sa diòtzesi at fatu sa donatzione sua: 20 mìgia èuros pro aviare is primos agiudos. “Sa Diòtzesi at a operare in su territòriu cun sa Caritas — si leghet in unu comunicadu — e in prus cun totu is voluntàrios chi ant a signalare sa disponibilidade issoro pro interventos ùtiles pro sa populatzione vitzichesa”.

LIGI PURU: Comente tue podes agiudare a Vitzi

Solidariedade puru dae is pastores sardos. Is allevadores sunt organizende•si pro una “paradura”, s’antigu gestu de solidariedade de su mundu pastorale sardu chi bidet protagonistas totu is allevadores ònnia borta chi unu de issos est in dificultade pro more de eventos etzetzionales, ponende a disponimentu mangime, atretzaduras e pegos.

Bighinàntzia a is vìtimas de s’alluvione puru dae s’iscuadra de su Casteddu: “Unu abbratzu forte a is comunidades dannificadas dae s’undamentu. Fortza Vitzi, fortza Sardigna” est su messàgiu publicadu in is canales sotziales. Un’istriscione cun “Fortza Vitzi, fortza Sardigna” est istadu postu in su setore Distintos de sa Sardigna Arena durante sa partida contra su Spezia. In prus, “pro agiudare sa comunidade de Vitzi at a bènnere ammanniada una regorta fundos ponende a s’asta is màllias de is calciadores”, at su diretore generale de s’iscuadra sarda, Mario Passetti. L.M


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*