Adiosu Tziu Lai. Eris nos at lassadu Antonello Lai, giornalista televisivu famadu in Sardigna ma pruschetotu in Casteddu pro su programa Zona Franca chi aiat imbentadu cando traballaiat in Tcs prus de trinta annos a oe.
Tziu Lai, comente ddu connosciant totus, fiat unu giornalista ùnicu in s’ìsula nostra pro ite tenìat unu modu de trabballare chi nois àteros giornalistas non tenìmus prus: andaìat tra sa gente, is pòboros, is chi tenìant prus dificultades econòmicas, is ùrtimos de custa sotzietade mala chi ddos ponet a una banda. Is periferìas de Casteddu pro issu fiant domu, a Tziu Lai bastaìat a pònnere unu micròfonu dae in antis a una bètza o unu giòvanu sena de traballu pro nos mustrare unu mundu chi s’imprenta prus de importu cuat, simpremente pro ite in cussos logos non andat e preferit abarrare a palas de una mesa in antis a unu computer.
Tziu Lai fiat unu giornalista pro contu suo. Fiat difìtzile a ddu bìdere in is addòbios de imprenta, cussos cunvocados dae is polìticos e Comunos o Regione, meda prus fàtzile imbetzes a ddu agatare in is rugas de San Michele, Sant’Elia, Mulinu Becciu o puru in nd’unu campu rom pro chircare de donare boghe cun unu micròfonu a is chi non tenìant sa possibilidade de si fàghere intèndere o pro chircare de risòlvere problemas (a bortas finas pighende corpos). Agiudaìat is pòboros a bortas finas boghende dinari dae sa butzaca sua.
Aiat detzididu de pònnere su giornalismu chi faiat dae sa parte de sa gente. Meda bortas mi so dimandadu si sa manera de contare sa realidade comente faghìat Tziu Lai esseret su modu giustu pro mustrare is persones chi benìant intervistadas. Difatis est capitadu chi unos cantos servìtzios televisivos de Zona Franca, chi como s’agatant in Youtube e in sa retza (“arruint in sa retza?”), siant divènnidos brullas pro is ispetadores (faghent rìere finas a mie). Tziu Lai fiat tziu Lai poita si poniat a su pròpiu livellu de sa gente chi intervistaiat, faeddaiat sa matessi limba, su casteddaju, e beniat bidu comente una persona chi donaiat agiudu cun sa professione sua, non comente unu giornalista chi andat a unu logu isceti pro nde leare unu tìtulu.
Sena de cussos servìtzios non diat èssere istadu possìbile bìdere e ascurtare is problemas de chie bivet in is domos populares, de sa gente chi non benit agiudada, de cussa gente chi bivet in Casteddu ma chi a s’ispissu est cunsiderada dae sa polìtica isceti cando nche sunt eletziones. Adiosu Tziu Lai, gràtzias.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
