In custas dies de basca sa chistione linguìstica sarda nch’est torra in mesu de sa dibata movende dae duos frontes diferentes e contràrios.
Su primu corfu chi cheret contadu est su chi benit dae una summa de siglas de màdrighe indipendentista e cun in intro sas organizatziones polìticas A Innantis (chi però est parte de sa majoria regionale cun Franciscu Sedda consulente de sa Presidèntzia), Liberu, Sardegna chiama Sardegna e sos giòvanos comunistas de Unigcom, s’assòtziu apartìticu Assemblea natzionale sarda, sos amministradores locales de sa Corona de Logu e s’assòtziu Lìngua bia.
Custas siglas, movende dae s’aprovatzione de su Pianu 2025-29 de polìtica lingìstica, acusant sa majoria de àere traitu sos impignos eletorales. A bisu de sos indipendentistas non b’at àpidu ascurtu de sas osservatziones de su territòriu e nemmancu de sos rilievos pesados dae sa II Cummissione consiliare.
«Abarrant abertos – narant – temas fundamentales comente sa definitzione de sos obietivos de perìodu longu, sos istrumentos de controllu, su ruolu de sos isportellos linguìsticos, su raportu cun s’iscola e, mescamente, su fràigu de una polìtica a tretu de nche torrare sa limba sarda in sos cuntestos ordinàrios de sa vida pùblica».
In custu iscenàriu narat sa sua fintzas su partidu de sa dereta natzionalista italiana Fratelli d’Italia, chi at presentadu un’interrogatzione contra a su ditzionàriu in Limba sarda comuna de sa Regione (nd’amus chistionadu sa chida colada) acollende sas positziones de s’Acadèmia de su Sardu. Sos de su partidu de Giorgia Meloni, chi dae annos cherent introduire s’ufitzialidade de sa limba de Dante in Costitutzione, sunt dae semper contra a sos amparos «esasperados» de sas limbas minoritàrios chi a bisu issoro faghent dannu a s’ùnica «lingua comune» chi connoschent.
Intrende in sa polèmica pigant sas chistiones pesadas dae s’Acadèmia ignorende, fintzas issos, chi si su lemma at a èssere in Lsc, bi devet àere logu pro sas trascritziones fonèticas mùltiplas e pro sas variantes formales, pro seguru iscritas sighende su repertòriu grafemàticu (repertòriu chi no est in opositzione a sa Lsc, comente si podet lèghere in sa delìbera 18/13 de su 2022).
Cantu bi cheret pro chi siat craru a totu cantos chi sa contrarierade a unu istandard ùnicu, cando chi sa limba dominante lu tenet, faghet su giogu de sos dominadores?
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
