Sunt belle finidas sas festas, e nche s’agatat dae in antis su divanu a chircare de eliminare sa sensatzione de istògomo tropu prenu.
Pro fàghere prus pagu graes sas seradas de domo bostras bi cherimus propònnere una lista de film chi contant sa Sardigna. Amus seberadu pellìculas chi tenent a fàghere cun s’ìsula nostra, o chi in manera simple chircant de la contare.
Càstia sa lista nostra:
Bellas Mariposas, de Salvatore Mereu (2013)
Est su contadu de una die de duas pitzocas de Casteddu, chi bivent cun famìlias ausentes e degradu urbanu. Un’istòria cuntemporànea, chi faeddat de cuddu perìodu difìtzile de sa vida chi est sa pitzinnia. Tràidu dae unu contadu de Sergio Atzeni.
Dimmi che destino avrò, de Peter Marcias (2012)
S’òpera de Marcias contat sa realidade de sos campos rom chi s’agatant a sas periferias de sa tzitade de Casteddu. S’istòria movet dae su possìbile rapimentu de una pitzoca rom a banda de su cumpàngiu suo, e unu cummissàriu e sa sorre de sa pitzoca ant a indagare subra de sa chistione.
Su Re, de Giovanni Culumbu (2013)
Su Re contat s’episòdiu de sa Passione de Gesù, sas ùrtimas dòighi oras de vida de unu Cristu chi faeddat in sardu e chi benit mandadu a sa cruxi. Est unu film cruu, originale e chi faghet emotzionare.
Treulababbu – Le ragioni dei bambini, de Simone Contu (2013)
Custu film presentat duas partes: Sa Règula e Su molenti de Oramala. Sa prima contat de su raportu de amighèntzia intre Efisio, unu pipiu, e Concaniedda, crabitedda. Concaniedda benit ochida pro fàghere petza, ma Efisio non tenet su coràgiu de li nàrrere sa veridade.
Su segundu episòdiu contat de unu pipiu chi s’est benidu a Sardigna. Pro issu no at a èssere fàtzile a s’integrare. Su film s’isnodat intre bisu e realidade, e chircat de torrare a leare unas cantas paristòrias sardas.
L’arbitro, de Paolo Zucca (2013)
Su tzìnema sardu est istadu paritzas bortas acusadu de èssere tropu cupu, ma L’arbitro de Paolo Zucca tenet su mèritu de ammentare cantu podet èssere còmica sa vida in una bidda sarda cale si chi siat. Su cast agiuat: Stefano Accorsi, Geppi Cucciari, Jacopo Cullin e Benito Urgu, totus meda in forma. A.D
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
